EzakwaMngomeni nemidlalo yokuvundulula ikhono
IZELAMANI, uThabo Mngomeni noThando Mngomeni, zihlela imidlalo yokuvundulula ikhono kunobhutshuzwayo eMatatiele ngoJuni 14 kuya kuJuni 17.
Le midlalo kungokokuqala izoba khona kanti izobizwa ngokuthi yiThabo, Thando Mngomeni Annaul Games.
UThabo waduma kakhulu eyibamba kuMtata Bucks lapho ahlwithwa khona yi-Orlando Pirates. Ngaphambi kwalokho uke wadlala kwiManning Rangers, D’Alberton Callies neCape Town City. KwiBafana Bafana udlale imidlalo ewu-37 washaya amagoli ayisithupha. Ugaxe amakhokho akhe emgibeni esedlalela iHellenic ngo-2002.
UThando yena uke wayibamba kwiMamelodi Sundowns emlande kwiSantos. Amanye amaqembu ake wawadlalela yiBidvest Wits, Bush Bucks, SuperSport United neHelsingborg yaseSweden. KwiBafana uke wadlala kahlanu.
IMatatiele iyaziwa ngokukhiqiza abadlali abagcina bedlalela iBafana. Omunye ovela eMatatiele ngu-Andile Jali okubhekeke ukuthi asayine kwiKaizer Chiefs lingakapheli isonto.
Kulo mqhudelwano kuzoba namaqembu awu-32 azoqhuthana kuze kuphume elizoba ngompetha ngoJuni 17. Izelamani zakwaMngomeni ziveze ukuthi kade zaqala ukuhlanganisa lo mqhudelwano. Ziveze ukuthi abadlali abasebancane abayisikhombisa abanekhono bazokhethwa kulo mqhudelwano, bayiswe eGoli lapho bezohlala khona baziqeqeshe nabadlali abagijima ezingeni elikhokhelayo. Kulokhu bathe babonga iMenza Group abazobe besebenzisana nayo kulo mqhudelwano.
“Yithuba elihle kakhulu labadlali abasebancane ukuthi bakhombise ikhono labo, nomphakathi ukuthi uzidelise ngebhola elisezingeni eliphezulu endaweni yawo. Siyaxoxa nomasipala waseMatatiele ukuthi ube yingxenye yomqhudelwano nabanye osomabhizinisi bakule ndawo.
“Umqhudelwano usinika ithuba elihle lokuthi kube khona esikwenzayo emphakathini. Sizomema izinhloli ezisuka emaqenjini ehlukene eNingizimu Afrika ukuzozibonela khona ngokwazo. Siyethemba ukuthi abanye babadlali abasebancane abazodlala kulo mqhudelwano, bazothola ithuba lokuyozama inhlanhla emaqenjini ebhola elikhokhelayo,” kusho izelamani zakwaMngomeni ngazwi linye.
Amaqembu aseMatatiele naseAlfred Nzo ayanxuswa ukuthi abhalisele lo mqhudelwano. Angenza lokho ngokushayela inombolo ethi 079 750 0381. Iqembu elizodla umhlanganiso lizohlomula ngoR75 000, kuthi elilale isibili lihambe noR15 000. Elizoqeda endaweni yesithathu lizothola uR10 000.