Usekubheke ngabomvu ukuthula uhlelo olusha
INTOKAZI eyazakhela igama ilingisa kuGenerations: The legacy uThando Thabethe, ithi isikubheke ngabomvu ukwethula uhlelo iThando Bares All oluzoqala ngoMgqibelo, Juni 2, ngo-9 ebusuku kuTLC (DStv 135).
Uhlelo bekumele luqale ekuqaleni konyaka kodwa kwagcina kungasenzekanga.
Ekhuluma ngalo uThando uthe isikhathi abantu abasilindile ukuthi kuqale uhlelo ngeke bazisole ngaso.
“Ngijabule kakhulu ukuthi abantu ekugcineni bazolubona uhlelo lwami. Sengikulinde ngabomvu ukuthi babone futhi baveze imizwa yabo ezingxoxweni esizobe sinazo nabantu abazongivakashela,” kusho uThando.
Uthe ababukeli nabo bazothola ithuba lokuphawula ngezindaba okunzima ukukhuluma ngazo futhi iningi elisabayo ukuxoxa nabantu abasondelene nabo.
Kulolu hlelo uThando uzobe ehambisana nentokazi, uCarissa Cupido.
“Kulolu hlelo sobe sikhuluma ngezinto ezehlukene ezenzeka njalo emiphakathini esiphila kuyo futhi sobe sikhuluma nabantu abajwayelekile kwezinye izikhathi kodwa kuzoba khona nosaziwayo.”
Uthe umbuzo osele manje wukuthi ngabe abazobonakala ohlelweni bazozivula yini izifuba ngezindaba abazivalele ezifubeni zabo.
“Mina akukho engizokushiya ngaphandle ezinkulumeni zethu nabantu engizobe nginabo ngoba lokho kungasiza noma kunike izimpendulo umuntu odlule esimeni esifanayo nalowo oyobe ekhona ohlelweni ngalelo langa,” kusho uThando.
UCarissa uzobe ekhuluma nabantu abahlukene emgwaqweni yaseGoli ebabuza izinto ezehlukene .