Uthuthelwe esibhedlela esizimele uMjik’jelwa
SESIPHUTHUNYISWE esibhedlela esizimele isihlabani sikamaskandi esixinwe ukugula. Ngemuva kokuthi Isolezwe liveze izindaba zokuthi kumbulwa kwembeswa kuMjik’jelwa esibhedlela sikahulumeni ngoLwesithathu, umfowabo uMnikezwa ‘Ismakwana SikaShafuza’ Ngubane uthe, lo mculi ubukeka elulama esibhedlela asekuso.
“Njengamanje (esho izolo) ngiyombheka ukuze ngibone ukuthi sesinjani isimo,” kusho uMnikezwa naye ongumculi kamaskandi oseqenjini, Abanganakiwe.
Kwenzeka lokhu nje, kuke kwaba nomyalezo osabalele ezinkundleni zokuxhumana obhalwe nge-instagram kaMjik’jelwa, lapho lo mculi abeqinisa khona abalandeli bakhe idolo.
Khona manjalo kunosomabhizinisi abathi bazimisele ukulekelela umndeni ngezindleko zokwelapha lo mculi ukuze alulame ngokugcwele.
Omunye wabo ngumhleli wemicimbi futhi ongusomabhizinisi uMnuz Sandile Sibiya wodumo lweKhuzimpi Maskandi Festival neNdidane vs Indidane Tour.
USibiya unxuse umndeni kaMjikijelwa ukuba usungule isikhwama lapho bezofaka khona imali yokuwuxhasa ezindlekweni ohlangabezana nazo.
“Sifuna ayiswe kodokotela abasezingeni eliphezulu ukuze kusheshe ukwelashwa kwakhe,” kusho uSibiya weMkhunjini Entertainment.
NoMnuz Mfishimfishi Dlamini osezakhele udumo ngokuhlela imicimbi kamaskandi neyesicathamiya eMzimkhulu uthe naye uzimisele ngokuthwalisa umndeni kaMjik’jelwa izindleko zokumelapha lo mculi.
Ebuzwa ukuthi uthini ngesiphakamiso salabo somabhizinisi uMnikezwa, uthe okwamanje ubecela abafuna ukunikezela ngosizo bathi ukuma ngenxa yokuthi kusenemizamo abasayenza bengumndeni kaMjik’jelwa. “Asisho ukuthi asizoludinga usizo, ngizocela ungixhumanise nabo ukuze ngizwe ukuthi bona bafuna ukusisiza ngani,” kusho uMnikezwa.