Ngicishe ngehlelwa wokunzima: uSomlomo
USOMLOMO kaMasipala waseNdumeni, uNkk uBongiwe Mbatha, uthi kunzima nokukhuluma ngokucishe kwamehlela ngemuva kokuboshwa kweMeya kaMasipala waseNdumeni ngozungu lokuzama ukumbulala.
Imeya, uMnuz Sboniso Mbatha, ikhansela, uMnuz Mthembeni Majola, nosolwa ngokuba yinkabi, uMnuz Celani Mkhwanazi, bavele izolo enkantolo yeMantshi eMtshezi ngamacala amabili okuthunga icebo lokubulala uSomlomo nosomabhizinisi.
Ekhuluma neSolezwe uNkk Mbatha uthe usadumele futhi ushaywa uvalo.
“Uyazi angazi nokuthi kufanele ngithini. Empeleni ngidumele. Sengethembe ukuthi umthetho uzokwenza umsebenzi wawo ukuze kuvele iqiniso,” kusho uNkk Mbatha.
Ubuye waphawula ngezikhalo ezivela emakhanseleni eqembu nakubaholi besiyingi ezimayelana nokuklwebhana phakathi kwakhe nemeya.
Uthe akulona iqiniso ukuthi ubuholi besiyingi abusakwazi nokusebenza ngenxa yokungezwani kwabo.
“Ngiyavuma ukuthi kuke kube khona ukuhlukana ngemibono phakathi kwami nemeya uma sisemhlanganweni. Nakuba kunjalo kodwa akukaze kufike lapho sithola khona izikhalo ezingaze ziphoqe ukuba sisule ezikhundleni zethu. Ngaphandle nje kwalokho mina angizikhulumi izinto zeqembu nabezindaba kodwa ngikholelwa ukuba ngizixoxe ezinhlakeni ezifanele,” kusho uNkk Mbatha. Ukuboshwa kwemeya kubhebhethekise uqhekeko phakathi kwabaholi be-IFP besiyingi saseDundee, okuhlanganisa namakhansela eqembu njengoba kukhona asefuna imeya noSomlomo basule. Lokhu kugqame izolo ekuseni ngemuva kokusabalala kwezindaba zokuboshwa kwemeya. Amakhansela nabanye abaholi be-IFP abebehlangene eDundee baveze ukuthi kade babekhala ngezinkinga ezithinta uSomlomo nemeya kodwa iqembu lingabanaki. UMnuz Sgqiki Dladla, iphini likasihlalo wesiyingi se-IFP eDundee, uthe iqembu balibhalele kaningi izincwadi bekhala ngokuziphatha kukaSomlomo nemeya.
“Ukuziphatha kwabo kulimaze iqembu kakhulu ngoba baxabana njalo kubangwa ukuthi amathenda kufanele anikwe bani. Sigcine sesicela iqembu ukuba libahoxise ezikhundleni zabo kodwa lizinyathele ngezinyawo izikhalo zethu. Lesi simo sifinyelele lapho nathi sesibona ukuthi abasalawuleki futhi benjalo nje abasazihloniphi izinhlaka zeqembu. Ngisho indlela abaphethe ngayo umasipala ngeke usho ukuthi bajutshwe yi-IFP kodwa bazenzela umathanda. Imeya nje uma ifikile emhlanganweni weqembu ihlale ijahile, ayibi naso ngisho isikhathi sokulalela ukuthi iqembu lifuna asebenze kanjani kumasipala,” kusho uDladla.
Amanye amakhansela athe kunabaholi asebesaba nokuphawula emihlanganweni mayelana nodaba lukaSomlomo nemeya ngoba asatshiswa ngokuphucwa ubulungu beqembu.
Ekuseni bekunombhikisho emgwaqweni omkhulu ophuma eDundee obheke eVryheid.
Kulo mbhikisho umphakathi ubukhala ngendlela okuphethwe ngayo umasipala negama lemeya beliphezulu bekhononda ngayo. Kuphoqeleke ukuthi amaphoyisa awuvale umgwaqo ngenxa yokushiswa kwamathayi.
Izimoto beseziyalelwa ukuba zinqamule emigwaqweni enqamula emzini yabantu eFarasdale.
Amanye amakhansela athe ngendlela isimo esibi ngayo agcina engasazi ukuthi azobika kubani ngemisebenzi yawo ayenzile kumasipala.