Baboshiwe abetulo lokusoconga
BAGQUNYWE esitokisini abasolwa abathathu, okubalwa kubo imeya, ikhansela nosolwa ngokuba yinkabi, abasolwa ngokuhlela itulo lokubulala uSomlomo kuMasipala waseNdumeni nosomabhizinisi.
Abasolwa, oMnuz Sboniso Mbatha (31) oyiMeya yaseNdumeni, Mthembeni Majola (38) noCelani Mkhwanazi (36) bavele eNkantolo yaseMtshezi izolo icala lahlehliselwa uMeyi 31 ukuze kuqhubeke uphenyo.
Laba bazogqunywa esitokisini kuze kuba bavela enkantolo ngesonto elizayo.
Izolo, ngesikhathi bevele enkantolo abameli babo kuthiwa bebefuna ukuthi badedelwe ngebheyili ngoba banemisebenzi yomphakathi okumele bayenze kodwa uMbuso kuthiwa uthe usaqoqa ubufakazi awukakulungeli ukuthi kulalelwe izethulo zokuthi bacele ibheyili.
Icala lihlehliselwe isonto elizayo.
Laba babhekene namacala amabili okuhlela itulo lokubulala.
Baboshwe ngoLwesithathu ngemuva kophenyo lophiko lwamaHawks esifundazweni ngezinsolo zokuthi bahlela itulo lokusoconga uSomlomo obekuzothi uma sebeqedile ngaye bese besoconga omunye usomabhizinisi.
IIFP ikhiphe isitatimende izolo yathi ishaqekile ngokuboshwa kwemeya yayo futhi iyaziqhelanisa nezenzo zabo.
Iphini lokhulumela i-IFP, uMnuz Joshua Mazibuko, lithe bangene ehlazweni njengeqembu.
“Simangele futhi siphoxekile ukuthola ukuthi iMeya uMbatha, ehola umasipala ophethwe yi-IFP waseNdumeni, iboshiwe ngezinsolo zokuhlela itulo lokubulala uSomlomo kuwo lo masipala, naye oseqenjini le-IFP,” kusho uMazibuko.
Uthe i-IFP ayihambisani nanoma iyiphi indlela yokuba nodlame ukuze ixazulule izinkinga esuke inazo.
“I-IFP ikuqonda kahle ukuthi okwamanje kuseyizinsolo ezibhekiswe kulaba (abasolwa) kodwa kuyalikhathaza iqembu ukuthi abantu okumele ngabe baba yisibonelo esihle bathinteka emacaleni alolu hlobo. Siyiqembu sesiqalile ukwenza uphenyo lwangaphakathi ukuze kucace ukuthi kwenzekani ngalezi zinsolo,” kusho uMazibuko.
Uncome amaphoyisa ngokusebenza ngokushesha ukuze kuboshwe abasolwa kungakabulawa muntu.
Isitatimende esithunyelwe i-ANC naso sihambe emazwini abe-IFP sagcizelela ukuthi yize kuseyizinsolo kodwa kusemqoka ukuba leli qembu (IFP) likhombise ukuthi alihambisani nabaholi abanenkohlakalo nabathinteka kwizigameko zobugebengu.
UNgqongqoshe woMnyango wezokuBusa ngokuBambisana nobuHoli boMdabu, uNkk Nomusa Dube-Ncube, uthe yize beshaqekile ngokuboshwa kwalaba kodwa bazodedela umthetho udlale indima yawo futhi bacela abantu baseNdumeni ukuthi behlise amaphaphu bayeke amaphoyisa enze umsebenzi wawo.