OweNatu ubesexwayisiwe ngababulali
IPHINI likaMengameli weNatu, uMnuz Allen Thompson, lithi lase lixwayisiwe ngokuthi liqaphele liphinde libuke izibuko uma lishayela ngoba kukhona abafuna ukulibulala.
UThompson uthe nakuba kunjalo ngeke basatshiswe ngokufa noma bangenwe amanzi emadolweni, bazokulwa nenkohlakalo yize sebebonile ukuthi kunabebezama ukumgudluza.
UThompson, obekhuluma okokuqala emphakathi namalungu eNatu emkhulekweni obuseMbizo Hall, ekomkhulu lenyunyana eMpangeni, uthe wasinda ngenkosi abasolwa abayisithupha babefuna ukuqeda ngaye.
“Sizoqhubeka silwe nenkohlakalo ngeke sisatshiswe ngokufa. Ngasindiswa wukuthi njalo ngiyazibuka izibuko zami. Ngase ngithole ucingo ngixwayiswa ngokuthi sivundulule izinto eziyinkinga ngakho kumele ngihlale ngiqaphile. Ngosuku lwesehlakalo ngangizibuka izibuko zami, ngabona bemisa imoto esiminyaminyeni ngabona bedonsa izibhamu badubula. Ngase ngitsheliwe ukuthi ngithinte isidleke sezinyosi ngakho kumele ngihlale ngiqaphile,” kusho uThompson.
Uthe bahlanganile nobuholi bomnyango, buholwa nguNgqongqoshe wezemfundo uMnuz Mthandeni Dlungwane nenhloko yomnyango uDkt Enoch Nzama ngoLwesibili babatshela ukuthi basola izikhulu zomnyango ngalesi sehlakalo.
UMengameli wale nyunyana, uMnuz Siphosethu Ngcobo uthe: “Sibatshelile ukuthi siyabasola ngalesi sehlakalo baphika. UDlungwane uphikile wathi kwaPata kusolwa yena ngokufa kukaMchunu (Mnuz Maqatha, isishoshovu se-ANC esabulawa eMgungundlovu). Uthe ngeke nje ayenza leyo nto, useyazisontela yena.”
UNgcobo uthe umhlangano ube ngoLwesibili eThekwini. Engxoxweni neSolezwe ngoLwesibili uDlungwane washo ukuthi uzohlangana neNatu bakhulume ngezinto ezahlukene.
UNgcobo uthe uqinise ezokuphepha kuThompson wathi ngeke bafelwe ngumholi.
UMnuz Kwazi Mthethwa, okhulumela uDlungwane, uthe uNgqonqoshe wafonela uNgcobo ngemuva kwesehlakalo wakhuza umhlola ngokwenzeka.
“Sisebenzisana nazo zonke izinyunyana asikhethi mabala. UNgqonqoshe wafonela ubuholi benyunyana wakhuza umhlola ngemuva kwalesi sehlakalo wadlulisa namazwi okuzwelana nomndeni kanjalo nenyunyana.”
UThompson uthe ngesikhathi edutshulwa wabaleka waze wafika esibhedlela wangena ngaphakathi wayocasha. “Kwafika izinto ezimbili, ukuthi ngiye esibhedlela noma ngiye esiteshini samaphoyisa. Imoto yabe isihamba ngenkosi ngidutshuliwe ngopha, ngizibona ukuthi ngiphelelwa ngamandla,” kusho uThompson.
Uthe wayiswa egunjini labagula kakhulu wathi kodwa esephuma wayishayela yena imoto yakhe inezimbobo zezinhlamvu.
“Kuyaxaka ukuthi kwathathwa wonke amaphepha emotweni, izikhwama zezingubo nezinye izinto ngaphandle kwesikhwama semali, amafoni kanjalo nokhiye wemoto. Yizinto okwakumele bazithathe kodwa bazishiya,” kusho uThompson.