Kuphenywa isikole saseThekwini ngezinsolo zokukhwabanisa
KUPHENYWA isikole saseThekwini esixube izinhlanga ngezinsolo zokukhwabanisa.
UMnyango wezeMfundo esifundazweni uthe uzoqala uphenyo ngezinsolo ezibikwe kuwo ngesikole iGeorge Campbell Technical. Lesi sikole phakathi kwezinto esisolwa ngazo kuthiwa asiyilandeli imigomo elawula ukukhethwa kwesigungu sabazali, iSchool Governing Body (SGB), futhi sinikeza othisha abathile imihlomulo engagunyaziwe.
UMnuz Kwazi Mthethwa, woMnyango wezeMfundo kulesi sifundazwe, uthe umnyango ubikelwe ukuthi lesi sikole siphethwe ngendlela engagculisi okuhlanganisa ukukhwabanisa, ukukhokhelwa kothisha abathile imihlomulo.
Uthe inhloko yomnyango uDkt Enock Nzama isiqoke ithimba labasebenzi abasebenza enhlokohhovisi yomnyango ukuthi liphenye ligxile enkohlakalweni nokukhwabanisa, ukweba, ukungalandelwa kwemithetho yokukhethwa kwesigungu esilawula isikole, ukunikezwa kwemihlomulo engagunyaziwe kothisha abathile nokweba.
Uqhube wathi kulindeleke ukuthi ithimba likhiphe imiphumela yesikhashana ehambisana neziphakamiso maduze.
Uthe ngenxa yokubucayi bemininingwane ebikelwe umnyango ngeke idalulwe eminye imininingwane ngalo.
“Sinxusa abantu abathintekayo kulolu daba ukuthi babambisane nethimba elenza uphenyo,” kusho yena.
Lesi sikole sike saba sezindabeni nyakenye ngesikhathi abafundi abamnyama bebhikisha bekhala ngokuthi othisha abamhlophe bayabacwasa, bababiza ngezinkawu.