Ingwadla ebhekene nofundela ubudokotela
SISENGCUPHENI yokungawuqedi unyaka isitshudeni esifundela ubudokotela esahlomula kuMasipala weTheku ngonyaka wokuqala, osekuvele ukuthi kwaba nokudideka umndeni wacabanga ukuthi wumfundaze.
Uyavutha unina kaSthembiso Nzuza owenza unyaka wesibili weBachelor of Medicine e-University of Witwatersrand, osamile ekutheni wenzelwe phansi uMasipala. UNksz Lindiwe Ngcobo waseMzinyathi uthe indodana yakhe isiyaphazamiseka nasezifundweni ngenxa yokuthi ayikho imali yokukhokha enyuvesi. Uthe indodana yakhe, ebifunda eNkosinathi High, yaphasa u-matric ngo-A abayisikhombisa ngo-2016.
“Ngashayelwa ucingo yihhovisi lemeya kucelwa uSthembiso ukuthi aye emcimbini wokuyoklonyeliswa e-ICC ngoba waphasa kahle. Kulowo mcimbi satshelwa ukuthi uzothola umfundaze ozomkhokhela izifundo nendawo yokuhlala. Kwathiwa bazothola noR50 000 wakwaHuawei noR15 000 wakwaNedbank,” kusho yena.
Uthe ubelokhu exhumana nehhovisi lemeya indodana yakhe yayoqala ukufunda eWits. UNksz Ngcobo uthe indodana yakhe yagcina ibhalisa ngemali yolunye uxhaso ngoba ekamasipala yaphuza ukukhokha. Uthe ugqigqe kwamasipala watshelwa ukuthi kusalungiswa inkontileka.
“Wacishe waxoshwa enyuvesi engayikhokhele indawo yokuhlala. Kumasipala babhalela inyuvesi incwadi beqinisekisa ukuthi uSthembiso uzokhokhelwa. Ngimangele ngoMeyi odlule sengitshelwa ukuthi ngeke akhokhelwe zonke izifundo,” kuchaza yena.
Uthe uSthembiso wagcina ekhokhelwe uR65 000 ohlanganise imali yakwaNedbank nakwaHuawei, ngokusho kwakhe athi kwakuyisipho hhayi umfundaze awuthenjisiwe. Uveze ukuthi incwadi eyabhalwa umasipala iqinisekisa ukuthi uzokhokhelwa isivale amathuba okuthi indodana yakhe ithole eminye imifundaze. Uthe indodana yakhe ingase ingabuyeli enyuvesi ngoJulayi uma ingayitholi imali.
Ukuthukuthela kwakhe ukuzwakalise nakuTwitter, wabhala nasekhasini likamasipala. Isolezwe liyibonile incwadi eyabhalwa umasipala ngoJanuwari 6, 2017 exolisa enyuvesi ngokuphuza ukukhokha. Kukhona nebhalwe ngoJanuwari 10 nonyaka eqinisekisa ukuthi uSthembiso ubexhaswe unyaka owodwa wakhokhelwa uR65 000 wezifundo wabuye wakhokha uR37 130 wemali yokuhlala.
UMnuz Mthunzi Gumede, okhulumela iMeya yeTheku uNkk Zandile Gumede, uthe unina wesitshudeni usehlanekezela inkulumo. Uthe sathenjiswa ukuxhaswa ngomhlomulo wonyaka obekungewona umfundaze.
“Kwakuzokhokhelwa unyaka owodwa wezifundo, ukuhlala nokubhalisa. UHuawei noNedbank abaxhasi bakamasipala abanxenxwa yimeya. Umasipala unezinhlelo ezimbili okungolwemifundaze nolwemihlomulo. Imifundaze ifakelwa izicelo ngoNovemba bese kuthi ohlelweni lwemihlomulo kukhethwe abafundi abavelele abayishumi eThekwini babongwe ngemiklomelo hhayi ngoba bezofundiswa,” kusho uGumede.
Uthe phezu komhlomulo umasipala waphinde wagixabeza uSthembiso uR37 130 wokugcwalisela emalini yonyaka owodwa. Ucele ukuthi uSthembiso afake isicelo somfundaze ngendlela efanele.