Kululekwa abavalelwe osonkontileka
ABASEBENZI bophiko lokuqoqwa kwemfucuza eSpringfield belulekwa ngokomphefumulo ngemuva kokuvalelwa ngosonkontileka abebefuna ukukhokhelwa imali yabo, ngoLwesithathu.
Kuthiwa osomabhizinisi abanezinkontileka zokuthutha udoti noMasipala weTheku ezindaweni ezisenhla neTheku, abangaphezu kuka-10 bagasele kula mahhovisi, ababili kubo bangene ngaphakathi bafike bakhiyela abasebenzi ebebeseboardroom, esesitezi sesibili.
Bebefuna ukukhokhelwa ngomsebenzi abawenze ngoEphreli, befuna nesiqiniseko sokuthi bazokhokhelwa ngomsebenzi wabo abawenze kule nyanga nabazowenza ngenyanga ezayo njengoba izinkontileka zabo zizophelelwa yisikhathi ngenyanga ezayo.
Okhulumela amaphoyisa kulesi sifundazwe uColonel Thembeka Mbele uthe kuvulwe icala lokwesabisa esiteshini samaphoyisa, eSydenham.
UMnuz Mandla Nsele okhulumela uMasipala weTheku usiqinisekisile lesi sigameko wathi nakuba kungekho muntu olimele kodwa izikhulu zalo mnyango ezintathu ebezikhiyelwe zisatshisiwe.
UNsele uthe uMasipala uzoqinisa ezokuphepha kuleli hhovisi.
Usonkontileka okhulume naleli phephandaba, ongathandanga ukudalulwa, uthe uMasipala awusigcinanga isithembiso osenze nosonkontileka.
“Asikhokheliwe, baqambe amanga, yingakho abantu bediniwe befuna ukwazi ukuthi bazokhokhelwa nini,” kusho yena.
UNsele uvumile ukuthi uMasipala usabakweleta osonkontileka.
“Yebo ikhona imali okumele ikhokhelwe osonkontileka, lokhu kudalwe wukuthi abawalethanga amaphepha aphelele.
“Isikhathi esilindwa ngosonkontileka abenzele umasipala umsebenzi yizinsuku eziwu-30, njengamanje lesi sikhathi asikapheli.
“UMasipala ukhokhela umsebenzi owenziwe ngendlela. Uma umsebenzi owenziwe ugculisa umphakathi futhi namaphepha afanele alethwa kwaMasipala, uMasipala uyasigcina isithembiso sawo,” kusho yena.
Kukholakala ukuthi kulabo somabhizinisi kukhona obehlome ngesibhamu. Sekungokwesibili osonkontileka betheleka emahhovisi akwaDSW bezofuna ngodli ukukhokhelwa.
Izinkinga zokuqoqwa kukadoti emalokishini sezenza izinkinga kwamasipala.
NgoJanuwari osonkontileka baseMlaza bavuka umbhejazana bachitha udoti ezitaladini zaleli lokishi, bekhala ngokuthi abakhokhelwanga.
Lokhu kwenzeka ngemuva kokuthi kuzwakele ukuthi ibhajethi kaR45 million eyayibekelwe ukuqoqwa kwemfucuza kuleli dolobha iphele ngezinyanga ezimbili.