Bagxeka ukuthinteka konogada
IPRIVATE Security Industry Regulatory Authority (PSIRA) isigxeke ukudubula okuthinteka kuko nonogada okuthiwa basebenzela inkampani yaKwaZulu-Natal esenzeke eBrakpan, eGoli.
Ekudubuleni okuthiwa kwenzeke ngoLwesithathu ekuseni kuqhume inganono kwalimala abantu abane, abanye bafa. Okhulumela iPSIRA, uMnuz Darlington Morudi, uthe isikhulu esiphezulu kwaPSIRA, uMnuz Manabela Chauke, usigxekile isenzo okuthiwa sihlangene nemboni yamatekisi.
Uthe uphenyo lwabo lwesikhashana luveza ukuthi kukhona abafile nabalimele. Kuthiwa kukhona onogada abawu-8 ababoshiwe ababhaliswe ngaphansi kwabo, abayisithupha kubo abasebenzela inkampani Ingonyama VIP Security yaKwaZulu-Natal.
Uthe amaphoyisa azophenya abese eyakuqinisekisa ukuthi abasolwa bakulungele yini ukuphatha izibhamu.
UChauke uncome amaphoyisa ngokuphuthuma endaweni yobugebengu wathi bona bayohlala bebambisene namaphoyisa ngaso sonke isikhathi ukuze abaphule umthetho babhekane nengalo yomthetho.
Uthe bakhathazekile ngezenzo eziningi zodlame ezithinta onogada bezinkampani ezizimele. Uthe ngeke kubekezelelwe ubugebengu obugqugquzelwa yizinkampani zonogada ezizimele.
‘’Onogada bangabokuqala okufanele baqinisekise ukugcinwa komthetho ngoba yibona abasekhaleni lempi yobugebengu. Kubalulekile ukuthi bahlale beziphethe ngendlela egqugquzela ezokuphepha. Ithimba lethu labaphenyi luyaphenya ukuze kuvele onke amaqiniso,’’ kusho uChauke.
Ngemuva kwesehlo ivaliwe irenki.