Isexwayiso somnyango ngezicelo ze-UIF
UMNYANGO wezaBasebenzi kuzwelonke usunxuse abantu ukuthi bangazifaki izicelo zemali ye-Unemployment Insurance Fund (UIF) ngokungemthetho ngoba bazoboshwa bagwetshwe.
Lo mnyango ukhiphe lesi sixwayiso ngemuva kokuboshwa kwabantu abathathu eMgungundlovu ngoLwesithathu ngamacala okufaka izicelo zemali ye-UIF enguR100 000 ngokungemthetho.
Okhulumela uMnyango wezaBasebenzi, uMnuz Teboho Thejane, uthe abasolwa babanjwe abophiko lweRisk Management kulo mnyango, uphiko olulwa nokukhwabanisa i-Anti Fraud and Intergrity Management bebambisene namaphoyisa akwaSAPS ngemuva kokuthi abasehhovisi lomnyango eMgungundlovu bebambe lo mkhonyovu ngesonto eledlule.
IPhini likaMqondisi weRisk Management, Anti-Fraud and Intergrity Management, uMnuz Sibongiseni Mpanza, lithe uphiko lwabo lucuphe unoxhaka namaphoyisa bacela abasolwa ukuthi babuyele emahhovisi omnyango ngoLwesithathu ukuze kuqedelwe uhlelo lokufaka isicelo semali bese beyakhokhelwa.
“Abasolwa bafake imininingwane engeyiyo yasemsebenzini. Omunye wabasolwa wathi usebenza kwaKFC, omunye wathi usebenza kwa-Affirmative Portfolios kanti owokugcina wathi usebenzi eRoyal Mnandi. Kuthe uma sekubhekwa nalezi zinkampani ukuthi banabo yini laba basebenzi babaphika,” kusho uMpanza.
Uthe omunye umsolwa ubene-payslip engumbombayi.
UMpanza uthe abasolwa babuziwe ngalo mkhonyovu bagcina bekhulume iqiniso basho ukuthi abakaze basebenzele lezi zinkampani, babe sebeboshwa babekwa amacala.
Umsolwa wokuqala kuthiwa wafaka isicelo sikaR29 747, owesibili wafaka isicelo sikaR34 000 kwathi owokugcina wafaka eka36 200.
Kucelwa noma ngubani onolwazi ngabakhwabanisa imali yomnyango ukuthi badlulisele lolu lwazi ku-08600 22194 noma bathumele i-email ku-fraud@labour.gov.za