OwaseMlaza ufundisa isiZulu eChina
OWAKULELI ofundisa isiZulu eChina usezitholele igama lesiChina abizwa ngalo yizitshudeni zakhe abangamaChina nazo ezizibiza ngamagama esiZulu uma zisekilasini lesiZulu.
UMnuz Thandanani ‘Wah’ Zulu odabuka eMlaza, uye kuleliya zwe eyokwenza iMasters Degree on Public Administration, ePeking University okungenye yamanyuvesi aphezulu, eChina.
UZulu ufike kuleliya zwe ngoSepthemba nyakenye ngemuva kwamasonto amabili efikile wehlelwa yinhlanhla yokuthola ithuba lokuthi ayofundisa isiZulu, eBeijing Foreign Studies University.
“Uthisha obefundisa isiZulu ngaphambi kwami wayengowokudabuka eChina kodwa efunde isiZulu eNyuvesi iYale, uthe uma eshiya, iNyuvesi yabona kungaba umqondo omuhle ukuthi ithole umuntu owasincela ebeleni isiZulu ozosifundisa. Ngatshelwa umkhaya wami esiphuma naye eNingizimu Afrika ngalesi sikhala esivulekile. Inhlolokhono yayinzima ngenxa yokuthi phakathi kwabantu ababengipheka ngemibuzo kwakukhona noDkt Xiujie Ma, onePhD yezilimi futhi osazi njengoba ezazi isiXhosa, ufunde eRhodes University, e-Eastern Cape. Ngaphambi kokuthi ngixoxelwe umkhaya wami ngalolu hlelo ngangingazi nokuthi kunohlelo olunjengalolu,” kusho uZulu.
Uthe wahlela noDkt Wa ukuthi bazobonana ngemuva kwamasonto amabili enze inhlolokhono, kulokhu wathi babezohlangana khona enyuvesi .
“Ngathi ngifika wathi ikilasi liyaqala ngo-8 ekuseni”
Uthe babezohlangana eWeigon Station kodwa ngaphambi kokufika khona kwakumele agibele isitimela esasizombeka khona. Kwakungokokuqala ehamba kule ndawo.
Ngesikhathi ehamba ehlangana nabantu wayebona abanye behleka, abanye bekhipha amaselula bemshutha ngokucasha, abanye bengamshutha umgangela.
“Ngaphenduka into yokuhlekisa kodwa ngakushaya indiva konke lokhu ngaqhubeka nendlela yami. Ngangifuni nakancane ukudlula isiteshi okumele ngehle kuso,” kusho yena.
Wathi engena ekilasini labafundi abahlanu ayezobafundisa wathi: “Sanibonani”, abafundi baphendula bathi “Sawubona, thisha.”
Laba bafundi bazethula kuye bathi bangoZenzele, uGugulethu, uSmangele, uJabulile, noXolani.
Wabatshele ukuthi ngalolo suku uzofundisa ngezinhlobo zamabizo, uXolani igama lakhe langempela okuwuLiu Haoyang, wayengazibekile phansi ezimisele ngokufunda kodwa ehlulwa ukuhlukanisa phakathi kwengxolo okusho ukubanga umsindo ngesiXhosa, noxolo.
“Wayebuye aphambanise ukuncela nongiyacela, ngesikhathi ngimlungisa ikilasi lalifa yinsini. Ngiyawuthanda umsebenzi engiwenzayo, ngizizwa sengathi ngimele iNingizimu Afrika, ngifundisa isiZulu ngibuye ngiqhakambise namasiko esiZulu. Ngibuye ngifundise namanye amagama afana nokuthi yini ishisanyama,” kusho yena.
Uthe nakuba kumnandi akwenzayo ukufundisa isiZulu, akazimisele ukuhlala kulo, ufuna ukubuyela ekhaya azobamba iqhaza ekuthuthukiseni izwe lakhe.
“Singalithuthukisa kanjani izwe lethu sibe singahlali kulo?” kubuza yena.