Ayisekho imidlalo ekhetha abamhlophe nekhetha abamnyama
KUBUKEKA sengathi abakwaSuperSport bavele bayigxoba ngazo zombili indaba ka-Ashwin Willemse ebandakanya ukususana kwakhe nabahlaziyi bebhola lombhoxo uNaas Botha noNick Mallet.
UWillemse ubonakale ediniwe ngesikhathi ebashiya benkemile ezindlini zokusakaza kubuka izwe ngoMgqibelo. Ngaleso sikhathi bekusanda kuphela umdlalo weSuper Rugby phakathi kweSharks neChiefs, sekuqala oweLions neBrumbies. NgokukaWillemse, la madoda (uBotha noMallet) avamisile ukumbukela phansi uma kuhlaziywa umbhoxo ngoba engumuntu omnyama. Abakunaki nokuthi uWillemse lo uyinkakha yamaBhokobhoko eyayishaya into ecokeme ngezikhathi zayo ngakho uwazi njengoba ezazi umbhoxo. Kusabukeka sengathi abamhlophe basacabanga ukuthi ibhola lombhoxo nekhilikithi yimidlalo yabo okumele idlalwe yibona, isakazwe yibona, ibikwe yibona iphinde ibukwe yibona.
Yindlela engamukelekile nakancane lena yokucabanga eNingizimu Afrika lapho iningi labantu abayakhele kungabamnyama. Asikho nesincane isidingo sokuthi kuthiwe ibhola lombhoxo nekhilikithi yinto yabamhlophe bese kuthi unobhutshuzwayo kube owabamnyama. Angikaze ngizwe nakanye kukhona ukubakhiphela eceleni abamhlomphe abake badlalela iqembu lesizwe namanye amaqembu amakhulu uma kukhulunywa ngonobhutshuzwayo.
Khona kwaSuperSport ababukelwa nje phansi abadlali bakudala abamhlophe abafana noNeil Tovey noMark Fish abaziwayo ukuthi ababa neqhaza elibonakalayo eqenjini lesizwe iBafana Bafana. Akumele vele babukelwe phansi ngenxa yebala labo oTovey noFish ngoba siyabahlonipha kakhulu ngeqhaza abalibamba ngesikhathi siwina i-Africa Cup of Nations (Afcon) ka-1996.
OkweSuperSport kuyaphoxa kakhulu kona ukuthi ivele yalumbambatha nje lolu daba. Kazi bekuzokwenzeka okufanayo yini ukube uBotha noMallet bebekhala ngokuthi akabaphathi kahle uWillemse uma behlaziya imidlalo kwithelevishini?
UWillemse ubengeke avele adube nje kubuka izwe ingekho into emcasulile. Sekuyisikhathi sokuthi labo ababezitshela ukuthi imidlalo ethile yaziwa yibona kuphela, bazi ukuthi lena yiNingizimu Afrika ekhululekile futhi sinolwazi olufanayo ngemidlalo edlalwa kuleli lizwe.