Sesiyambonga lo nompempe bakithi
MHLELI: Ngivumele ngizwakalise ukungathokozi kwami ngezinqumo zakamuva zikanompempe uVictor Hlungwani. Abalandeli abaningi bachitha imali enkulu behambela imidlalo yamaqembu abo ukuze beyonikeza umfutho lawo maqembu ezindaweni ezehlukene. Badele isikhathi sabo esiyikhethelo sokuba nemindeni yabo ngenxa yothando lwebhola nothando lweqembu labo.
Sonke siyazi ukuthi ibhola liyagingqika futhi imiphumela kuyenzeka ikuvume futhi kuyenzeka ikuphike kodwa kuba buhlungu uma imiphumela izokuphika ngenxa yezinqumo ezingezinhle ezithathwa ngunompempe. Sihlezi silindele ukuthi sibuke umdlalo omuhle ongenazihibe. NgoLwesihlanu sisuke eKZN (eMgungundlovu) abanye bethu bangaya emsebenzini siyokweseka iqembu lethu.
Kube buhlungu sesidliwa ngenxa yesandla sikanompempe. Izinqumo zakhe bezichemile. Kunezikhawu ezimbili ezibonwe izwe lonke nabasakazi bethelevishini bakuvezile ukuthi unompempe uphaphalazile. Umdlali weFree State Stars ubambe ibhola ebhokisini washaya engathi akaboni unondweba. Baphinda bawisa uLebo Maboe ebhokisi wavele unompempe wanikeza uLebo ikhadi eliphuzi ethi uziwisile.
Kukaningi sibona abalandeli bekhombisa ulaka lwabo ngenxa yezinqumo zonompempe. Thina njengabalandeli beqembu iMaritzburg asifisi ukubalwa nabalandeli ababhebhezela udlame ezinkundleni zezemidlalo kodwa kuyasikhathaza ukuhlushwa yindoda eyodwa ngezinqumo zayo ezingezinhle.
Abaphathi bonompempe abayisukumele le ndaba ngoba noma sizinikele ekuziphatheni kahle ezinkundleni kodwa intukuthelo ngelinye ilanga iyoba ngaphezu kwethu bese sithatha izinqumo ezingezinhle. Sesiyambonga uVictor Hlungwaniemidlalweni yethu bandla. NasePrincess Magogo wenza izinto ezingezinhle sidlala ne-Eagles. Lindokuhle Gumede EMGUNGUNDLOVU