Bathuthukisa amabhizinisi asemalokishini
KUZOKHANGISWA imisebenzi yosomabhizinisi basemalokishini okokuqala ngqa akhele idolobha lasePinetown ngale mpelasonto. Lo mcimbi wosomabhizinisi obizwa ngeKasi Market uzoba seBhodini Lifestyle, KwaSanti ngo-11 ekuseni ngeSonto.
Omunye wabagqugquzeli balo mcimbi, uNksz Zandile Mchunu, uveze ukuthi bathathe isinqumo sokuhlanganisa osomabhizinisi bendawo ukuze baziveze emphakathini ngemisebenzi ehlukene abayenzayo.
Inhloso yokuyenzela elokishini ukuthi abantu bakwazi ukuphumelela ngobuningi babo futhi bathole ithuba ngokulinganayo njengoba kukhona nabangenazo izimoto zokusheshe bafinyelele amadolobheni.
UNksz Mchunu uthe ukuyozikhangisa ngaphandle kwendawo ohlala kuyo kugcina kudla kakhulu imali kosomabhizinisi kanti iningi labo lisafufusa liyayidinga imali engenayo kunephuma ngaphandle.
“Ziningi izinto ezenziwa abantu kodwa ngoba abaziwa kahle osomabhizinisi bendawo, abantu bagcina beyofuna izinto ngemali ebizayo emadolobheni.
“Sifuna bazethule emphakathini futhi bazane bodwa bengosomabhizinisi ukuze balekelelane nangokwenza imisebenzi kulabo abenza izinto ezifanayo. Akumele baze baphumele ngaphandle bayozimaketha kwezinye izindawo bebe bekhona abantu bendawo,” kusho uNksz Mchunu.
Eqhuba uthe noma beqale ngokulethula KwaSanti lolu hlelo kodwa bazowazungeza wonke amalokishi akhele iPinetown.
Noma izinsuku eziqondile bengakazihleli kodwa uNksz Mchunu ukuqinisekisile ukuthi bazokwenza umcimbi ofanayo naseKlaarwater, KwaNdengezi, Savannah Park namanye. UNksz Mchunu uthe kuzobe kunamatafula okukhangisa imisebenzi yabantu azobiza uR200 lilodwa.