‘Ungalindi ukubulawa phuma uma kubheda’
“BALEKA mama. Khaw’leza... Uthi uyandithanda...Isizathu andisiboni...Ndiphinde Nalwa Izolo, Isizathu Yini...”
Ingwazi yomculo we-Afro soul, uRingo Madlingozi, ithi izobe isho kanje seyikhuthaza abantu besifazane emcimbini, iCelebrate Africa Carnival & Festival, eWorkshop Centrum Park eThekwini ngoMgqibelo kusukela ngo-11 ekuseni.
URingo uthe uyabagquguzela abantu besifazane ukuthi bashiye kusashisa ebudlelwaneni uma kungasahambi kahle.
“Akumele balinde amathonsi abanzi. Uyazibona izimpawu zokuhlukumezeka.
“Ngakho musa ukulinda ukuthi uze ubulawe,” kusho uRingo.
Leli cwecwe elalisihloko sithi Baleka kaRingo alikhipha ngo-2004 ladayisa amakhophi angaphezulu kuka-75 000 futhi namanje lisenza kahle ezitolo ngenxa yalo myalezo.
Eqhuba uRingo uthe uzobuye akhuze ukucwaswa kwabantu bangaphandle ngengoma yakhe ethi, Nkqo Nkqo Nkqo.
“Ngizofuna abantu bakuleli basukume bame ngezinyawo bese bebambana nabangaphandle ngezandla, bacule kanye nami.”
Uthe abantu abazohambela lo mcimbi bazobhema bakholwe ngempela.
“Uzokhumbula ukuthi kwenzekani mhlazane ngicula lapha eThekwini.”
URingo uzobe eshiyelana inkundla nabaculi abahlukahlukene okubalwa kubo uDJ Tira, Khuzani Mpungose, Distruction Boys, DJ Happy Gal, Tipcee, Brodaz & Vino, DJ Boonu, DJ Phelzo nabanye.
Lo mcimbi uhlelwa inkampani kasomabhizinisi odumile eThekwini uZanele Mbokazi weMirror Public Relations, kanti kuzo kungengwa mahhala.