Inkulumo kaKhumalo ilumele kwiBaroka
I-BAROKA FC evume eyokweshela inkakha yeKaizer Chiefs neye-Orlando Pirates, uWedson Nyirenda noDan Malesela, ayizange iyithande inkulumo kaDoctor Khumalo yokuthi uma emenyezwa (yiChiefs) ngeke acabange kaningi, uyosabela.
Izikhulu zeBaroka zikuqonda kahle ukuthi uKhumalo, ongene endaweni kaMcDonald Makhubedu ngasekupheleni kwesizini, uyilokhu ayikho ngenxa yawo Amakhosi kodwa aziyizwa le ndaba yokuthi njalo iqembu, abadlali manje nabaqeqeshi bamataniswe naleli qembu laseGoli.
“Iyangicika le nto yokuthi kubuzwe uDoctor ngendaba yeChiefs ekubeni esemabhukwini ethu. Angiyena unodoli weChiefs mina ngineqembu okumele ngiliyise phambili.
“Uma kukhona oweChiefs ofuna ukukhuluma nami ngokuthile kumele aqondane nami hhayi ukukhuluma kwabezindaba,” usho kanje usihlalo weBaroka, uKhurishi Mphahlele.
Mayelana nokweshela uNyirenda wodumo ngokuqhulula amagoli kwiChiefs, uMphahlele uvumile ukuthi bayakhuluma naye kodwa bakhona nabanye abababhekile.
“Yebo, uNyirenda ungomunye wabaqeqeshi esikhuluma nabo. Nokho ngifuna ukukubeka kucace ukuthi asikasayini lutho naye. Akuyena kuphela umqeqeshi esixoxa naye njengamanje kodwa bakhona nabanye. Uma sesiqede yonke into sizokwenza isimemezelo,” kusho uMphahlele.
Yize kukhona noMalesela kulabo abafunwa yiBaroka kodwa inkulumo kaMorgan Mammila oyisikhulu esiphezulu seqembu, ikhomba ukuthi bahamba noNyirenda.
“Sisebenza kanzima nosihlalo ukuthola umqeqeshi onamava. Esikucelayo kubalandeli bethu ukuthi abasilinde kodwa sizomemezela maduze ukuthi ubani ozobe esihola ngesizini ezayo. Sizoqasha umqeqeshi oseke wadla isicoco seligi e-Afrika, oseke waqeqesha kwiCAF Champions League kanti sifuna umuntu oseke wayibamba naseqenjini lesizwe okungenani elilodwa,” kusho yena.
Konke lokhu kukhomba kuNyirenda oseke wadla izicoco neZanac, Zesco United neGreen Baffuloes eZambia kanti ugile izimanga neqembu lesizwe laseZambia kusukela eqashwe ngo2017.