Abadlali beCeltic basebumnyameni ngekusasa
BASEBUMNYAMENI ngekusasa labo abadlali beBloemfontein Celtic okusanda kuvela ukuthi isifakwe endalini ngusihlalo uMax Tshabalala.
ICeltic iqede isizini ka-2017/2018 ngaphandle kwe-Top 8 nakuba idlale owamanqamu kwiTelkom Knockout ehlulwe kuwo yiBidvest Wits. Nokho le sizini ihambisane nemibiko engemihle yokungaholelwa kwabadlali ngesikhathi okuthiwe kudalwe wukuthi iqembu lintula inkece. Kuleli sonto kuvele ukuthi iPhunya Sele Sele ingase ilahlekelwe ngumqeqeshi uVeselin Jelusic waseSerbia okuthiwa sekuphele izinyanga ezimbili engawutholi umholo ophelele.
Omunye wabadlali beCeltic uthe abazi ukuthi ikusasa libaphatheleni ngoba abakaze batshelwe ngokwenzeka eqenjini. Abadlali beCeltic bahlukane emuva komdlalo wokugcina wesizini neMamelodi Sundowns obukade useDr Molemela Stadium. Batshelwe ukuthi kufanele babuye ekhempini ngoJuni 30 ukuzolungiselela isizini ka-2018/2019. “Asazi ukuthi kwenzekani. Nathi sifunda emaphepheni ukuthi iqembu liyadayiswa kodwa akekho eqenjini ositshelile. Sesilinde ukuthi sizwe ngabo uma sesivula ukuthi kwenzekani. Okwamanje mina nginenkontileka neqembu, yikhona okwenza ngingabi nalo uvalo. Kodwa okungenza ngingakhululeki wukuthi kungenzeka kudingeke siqale ukufuna imisebenzi,” kusho lo mdlali. Kuthiwa sekuvele kukhona osomabhizinisi baseGoli abazimisele ngokuthenga iCeltic kodwa uTshabalala usazohlangana nabalandeli kuleli sonto. UTshabalala, othenge iCeltic ngo-2014, ucashunwe ethi akusizi ukugcina iqembu ekubeni edonsa kanzima kwazise imali ayikhokhayo iphazamisa inzuzo angabe uyayenza emabhizinisini akhe.
Ukudonsa kanzima kweCeltic kugqame kumasizini ambalwa edlule ngesikhathi ihluleka ukugcina abadlali bayo ababalulekile okukhona kubona uThapelo Morena oseyibamba kwiSundowns. Ngesizni esongwayo ihlukane noKabelo “Skipper” Mahlasela osekwiKaizer Chiefs.
Imizamo yokuthola isikhulu seCeltic, uRali Ramabodu, ayiphumelelanga kwazise ucingo lwakhe belivaliwe.