UNdlovu owokuphathiswa okwezicathulo okuwukuphela kwazo
IZIMO zempilo yakudala zasifundisa ukuthi okuhle noma okubalulekile osuke unakho, ukuphathe kahle ungavumi ukuthi kukulahlekele noma kuguge nje kalula.
Ngisakhula le phansi kwezintaba zangakithi ezinhle zoKhahlamba, yayingekho indaba yokuthi ube nezicathulo zesikole bese ubuye ube nezokuswenka. Leyo nto yayenzeka ngokwamagama kuphela lapho wawuba nelesikole bese kuba khona elokuhlala ekhaya (angazi kwakudlalelwani ngathi). Ayiphathwake indaba yokugqoka izicathulo ubhuquza ekhaya, wawungabe uzithathe kuphi nje ezokudlala obhuqwini?
Izicathulo engangizigqoka esikoleni kwakumele ngizinakekele kakhulu ngoba kwakuphinde kube yizona futhi engangizigqoka esontweni (yebo ngangisonta nami ngezikhathi zami, ngingakawi). Kwakuthi uma izulu lina siphuma esikoleni sikhumule izicathulo sizifake ezikhwameni zethu ukuze zingagugiswa amanzi nodaka. Ngelinye ilanga izicathulo zazisala ekhaya umuntu alubhadule ngonyawo eqonde khona esikoleni.
Ukunakekela izicathulo kwakuyinto esasiyifundiswe emakhaya, futhi kwagcina kuyinto nje eyayingadingi ukuthi siyikhunjuzwe. Mhlawumbe yingakho ngathi sengikhulile, sengibamba amatoho, ngaqinisa kakhulu ekuthengeni izicathulo uma kuqhathaniswa nezinye izimpahla zokugqoka. Namanje ngiyazifela ngezicathulo futhi angingabazi ukuzithenga uma kukhona engizibuke ngazithanda esitolo, ekhona namasentshana.
Nokho indaba ayikho ngezicathulo kule ngosi namuhla kodwa imayelana noSiphesihle Ndlovu weMaritzburg United. Angisheshe ngicacise kodwa ukuthi angibhali ngalo mdlali namuhla ngoba nakhu enegama elifana nelami kodwa ngichazwa wukudlondlobala kwakhe nekhono elingadinge kuchazwa analo uma kukhulunywa ngebhola likanobhutshuzwayo.
Asikho isidingo sokulokhu ngenaba kakhulu ngento eyenziwe uNdlovu, engimbiza ngoMr Tuck In ngenxa yendlela ahlale egqoke ngayo enkundleni, kule sizini esanda kuphela. Lo mdlali ushaye into ecokeme kakhulu esiza iqembu lakhe ukuthi lidlale kowamanqamu weNedbank Cup. IMaritzburg iphinde yaqeda endaweni yesine kwi-log ye-Absa Premiership.
Angifuni ukubukela abanye abadlali beTeam of Choice phansi sengathi ubedlala yedwa uMr Tuck In kodwa ukuqokelwa kwakhe imiklomelo emihlanu njengoba kuzoba nomcimbi wePremier Soccer League (PSL) ngesonto elizayo, kukhomba kona ukuthi ulenyusile kakhulu izinga.
U-Mr Tuck In ungomunye wabadlali abayikusasa likanobhutshuzwayo eNingizimu Afrika, akukho ukungabaza kulokho. Njengoba eneminyaka ewu-21 nje kuphela udinga ukubanjwa ngesandla, aholwe, anikwe neziyalo ezifanele ukuze lingapheleli emoyeni ikhono lakhe. Baningi abadlali abaqale njengoMr Tuck In kodwa ngokuhamba kwesikhathi kwagcina kuphele nya ngabo. Kulokho kumele kusolwe abaphathi bamaqembu ebhola, izimenenja zabadlali, abazali babo, abaqeqeshi nabangani abangalungile abagcina bebaholele ezindaweni zobumnyama abadlali abasebancane.
Siwumphakathi kumele sibambisane ukuvikela abadlali abafana noNdlovu ngoba yibona abazoyibamba kwiBafana Bafana lena esisuke sifuna ukuyibona idlala kwi-Africa Cup of Nations (Afcon) neNdebe yoMhlaba. Angifuni ukubala amagama abadlali abaqala kahle njengoNdlovu ebholeni laseNingizimu Afrika kodwa bagcina bengeyilutho ngenxa yotshwala, izidakamizwa nokuhubha amantombazane. Kungaze kuthiwe ngibukisa ngabo ngoba nakhu nginamandla okubeka uvo lwami kulesi sikhala engisinikwe yiSolezwe. Okubalulekile manje ukuthi kutholakale indlela yokuqinisekisa ukuthi abadlali abanekhono (nalabo abazithandela unobhutshuzwayo) belulekwa ngokufanele ngendlela okumele baziphathe ngayo ukuze ikusasa labo lingashabalali okwamazolo ebona ilanga.
Yinto esingeke siyibalakele ukuthi umdlali osemncane njengoMr Tuck In uvele adideke aphele uma esehola u-R50 000, uthole ukuthi ezinyangeni ezimbalwa ezingaphambi kwalokho ubengakaze abe nawo ngisho u-R5 000 kwi-akhawunti yakhe yasebhange. Yisimo lesi okumele sibhekisiswe kakhulu ngoba kunzima ukuziphatha ngendlela efanele uma usemncane uhola imali ongakaze uyicabange ngisho ujulile uzibuza ukuthi yini engase yenzeke kuwena ezinyangeni ezimbalwa ezizayo.
Okunye okubalulekile okufanele kwenzeke kuNdlovu wukuthi angajahi ukushintsha iqembu. Yebo kungaba yinto enhle ukuthi simbone eshaya into ecokeme emaqenjini afanana neMamelodi Sundowns, Kaizer Chiefs ne-Orlando Pirates kodwa ukusayina kula maqembu kubuye kuze nezinkinga ezidala ukuthi kuphele ngomdlali. Ngokwami nje bekungaba kuhle ukuthi uNdlovu ahlale noma yisizini eyodwa kwiMaritzburg ukuze akhule ngokwanele, bese ebonake ngesizini ezayo ukuthi yiliphi iqembu angaya kulona.
U-Mr Tuck In ngimfanisa nezicathulo lezi engangiziphathisa okwezikhali zaMantungwa ngenxa yokuthi kwakuyizona zodwa enganginazo. Kumele anakekelwe ngayo yonke indlela ukuze ngelinye ilanga sigadle ngaye kwi-Afcon nakwiNdebe yoMhlaba kukhale izizwe. Uma lokho sikwenzile ngokubambisana njengesizwe, uNdlovu uyoba umdlali ophezulu. Kwazi bani mhlawumbe ngelinye ilanga angazibona egijima phesheya kwezilwandle.
Ngimfisela konke okuhle azifisela kona empilweni uMr Tuck In. Nokho engikufisa kakhulu ukuthi azihlanganise nabantu abambona njengezicathulo okumele zinakekelwe, zipholishwe bese zisetshenziswa ngendlela eyiyona.