Umdlali ubangwa yiSundowns neChiefs
UBANGWA yiKaizer Chiefs neMamelodi Sundowns umdlali weBaroka oyibamba ngakwesokunxele phambili, uTalent Chiwapiwa. Isolezwe lihabule lezi zindaba ngomthombo walo othembekile ukuthi uChiwapiwa usohlwini lwabadlali abafunwa yiChiefs neSundowns. “ISundowns neChiefs sebeke bamthinta uMike Ngobeni ophethe izindaba zikaChiwapiwa. Womabili amaqembu ayamfuna. Usenenkontileka neBaroka kodwa uKhurushi Mphahlele, usihlalo weqembu, uvule izandla emaqenjini azimisele ngokushaya ephaketheni asayinise uTalent,” kusho umthombo. IChiefs neSundowns bamatasa bazama ukuqinisa izikwati zabo ngaphambi kokuthi kuqale isizini ezayo. Womabili amaqembu azama ukusayinisa umdlali wasesiswini weBafana Bafana, u-Andile “Gattuso” Jali, okubhekeke ukuthi athathe isinqumo maduze nje ngokuthi uzodlala kuliphi iqembu ngesizini ezayo.
Kuthintwa uMphahlele ngodaba lukaChiwapiwa uthe kalikho iqembu eselike lamthinta ngalo mdlali.
UChiwapiwa uthathe iso lenqwaba yabathandi bebhola ngengcwenga yebhola nemijiko eya phambili ayikhombise kwiBaroka kule sizini esanda kusongwa.
Imenenja kaChiwapiwa, uNgobeni weM-SportManagement ikhale ngokuthi kunzima ukuphawula ngalo mdlali.
“UTalent ungumdlali weBaroka FC. Amaqembu amfunayo kumele axhumane neBaroka. Mina angikwazi ukuphawula ngokuthi ufunwa yiliphi iqembu. Amaqembu amfunayo azothinta iBaroka, uma eseyithintile mina ngizobe sengizwa ngeqembu. Yilapho-ke ngizobe sengiqhamuka khona ukuzoxoxa ngezimfuno zomdlali. Uma uthi ufunwa yiChefs neSundowns ngicabanga ukuthi kuyinto ezomkhuthaza ngoba lokho kuchaza ukuthi wenza umsebenzi omuhle,” kusho uNgobeni.
IChiefs ayikaze isivale isikhala sikaGeorge Lebese ngakwesokunxele phambili kusukela eshiye iqembu ngoJanuwari wajoyina iMamelodi Sundowns. Amakhosi ake amataniswa noVincent Pule osemabhukwini eBidvest Wits. Nokho lo mdlali usekhonjwa kwi-Orlando Pirates.
IChiefs inoSiphiwe Tshabalala kuphela kubadlali abadlala ezinhlangothini abagijima ngakwesokunxele phambili. UPhilani Zulu noSibusiso Khumalo abakwaziyo ukudlala ngakwesokunxele phambili basetshenziswa emuva.
UThulani Thuswa wezokuxhumana kwiSundowns akazange atholakale kwazise ezakhe bezidlala kwiCAF Champions League eGuinea ngoLwesibili. IChiefs ithe izobiza isithangami nabezindaba ukuzokwethula abadlali abasha nomqeqeshi.