IFord Fiesta ifika nezinhlobo eziningi
Isuka ekhasini 4
ABASHAYELI bangakwazi ukuthola iFiesta enenjini i-1.0 litre EcoBoost kaphethroli. KwiTrend uyithola ngo-gearbox oshintshwayo oyi-6 speed kodwa uma uthanda uyakwazi ukuyithola ngozishintshayo oyi-6 speed. Ozishintshayo uyawuthola nakwiTitanium.
Le njini ikhiqiza amandla angu-74 kW netorque engu-170 Nm. ITitanium eno-gearbox ozishintshayo yona inamandla angu-92 kW.
Kulabo abafuna enenjini eyongayo kukhona i-1.5 litre TDCI turbodiesel etholakala kuphela ngo-gearbox omusha oyi-6 speed manual. Inamandla angu-63 kW netorque engu-175 Nm.
Kuzona zonke bazenze zakwazi ukuthi zizicishe injini uma zimile futhi zinebhathini lika-Eco kwezishintshwayo ukuze zonge.
Ngesikhathi yethulwa sithole ukuthola ithuba lokushayela ekadizili eshintshwayo. Singena kuyo nozakwethu ebesihamba naye sihlale ngokukhululeka futhi namahlombe ethu engashayisani.
Siphuma endaweno yokupaka isiteringi besijika kalula. Yize ngokwezinombolo ibukeka inamandla amancane kodwa i-torque yayo engu-175 Nm yenza ukuthi kungezwakali ngoba iwathumela ngokushesha emasondweni. Nokho uma kunyukela kumele wehlise igiya ukuze izobamba ijubane osuke uhamba ngalo
Umsindo wenjini ngaphakathi ubumncane futhi ibihamba kahle futhi intofontofo, ngenxa yamasondo amakhulu.
Ezishintshayo ngiqaphele ukuthi amagiya angena kalula futhi kwesinye isikhathi ungayizwa nokuthi isiyashintsha. Uma uthanda uyakwazi ukuzishintshela wena.
Ngakwezokuphepha iphuma nama-airbag ngaphambili, emaceleni nama curtain airbags. Ifika futhi nama-ABS brakes ane-Electronic Brake Assist ne-Electronic Brakeforce Distribution kanjalo neHill Launch Assist ne-Electronic Stability neTraction Control.
KwaFord bathi iFiesta ishibhile kunePolo futhi izinto eziningi zifika nayo ngaphandle kokufaka imali ethe xaxa. Lokho kungenye yezinto ababheke ukuthi zihehe abathengi. Ngicabanga ukuthi izoba yimbangi enhle yona kodwa angazi noma abantu bazokwazi yini ukungalithengi iPolo, okuyimoto enomlando futhi abantu abayethembayo, bathenge iFiesta. AMANANI Fiesta 1.0 EcoBoost Trend 6MT R261 900
Fiesta 1.0 EcoBoost Trend 6AT R277 300
Fiesta 1.5 TDCi Trend 6MT R292 500
Fiesta 1.0 EcoBoost Titanium 6MT R295 900
Fiesta 1.0 EcoBoost Titanium 6AT R310 600
Zonke ziphuma ne warranty yeminyaka emine noma ibanga lika-120 000km, roadside assistance yeminyaka emithathu ne corrosion warranty yeminyaka emihlanu. Kukhona ne service plan yeminyaka emine noma u-60 000km kanti kumele iye kwisevisi ngemuva kwebanga elingu-15 000km.