Asiwugcine uphephile uphethroli
KWASUKA futhi lokho okuthi mangisho ngengila ngimemezele ukuthi sonke masiqinisekise ukuphepha eduze kwethu sibe sishaya ama-hazard sibuyele eceleni lapho kuphephe khona ngethemba lokuthi sisaphile saka.
Ngicela ningivumele nginithathe ngamehlo engqondo ninisingise ngasenyakatho ngokugudla ugu lapho umhlaba ulingana ngakhona.
Ngisho endaweni okudingeka ukuthi udlule emasimini angodedangendlale besithelo esishishibele phansi sikaphayinaphu, uguduze ngomgwaqo onqamula emahlathini lapho kucanasa khona izilwane zasendle.
Uma uphumela ngaphesheya kwalodukathole wehlathi uyaqhubeka umgwaqo uthi woza, uma ucabanga igaraji lika phethroli ucabanga iHluhluwe noma iMbazwana, okucacayo ukuthi uma uphambeke kulezi zindawo kungenzeka udinge ukugingqa izithupha nesigubhu ubheke ezimpompini.
Sisajulile ngalo mcabango sizithela esigubhini esichwanekwe phezu kwesigxobo. Lesi sigubhu siwuhlobo lwesigubhu samanzi ahloliwe kodwa siqukethe into ebukeka ibomvana njengo phethroli. Nebala sime sixoxe nababhemu esibafica kule ndawo yakwaMnqobokazi. Bathi yebo bathengisa ngophethroli ubiza uR90 ngesigubhu esingu-5 litre.
Sixoxile nelezi zinsizwa ngaze ngakhumbula ukuthi ezindaweni eziningi esengike ngaya kuzo sekujwayelekile ukuthi kube nemizi edayisa uphethroli.
Izindawo engizaziyo nje ngibala eBhamshela, naseMbhava kwaSwayimane nakwezinye izindawo kuyenzeka uthole imizi noma abantu abadayisa uphethroli emgwaqweni.
Ingxoxo yethu ayiqondile ukuhlasela abadayisi bakaphethroli basemgwaqweni kodwa ukubasiza ukuthi nakuba bengenazo izincwadi namagunya okugcina izinto ezithakwe ngesibabuli esingagqamuka amalangabi noma nini kodwa ukuphepha makube phambili.
Empeleni akuzona zonke izigubhu ezidalelwe ukuphatha uphethroli. Kungalesi sizathu amanye amagaraji engakudayiseli uphethroli uma uzofika uphethe isigubhu esingavunyiwe. Izigubhu ezivumeleke ukuphatha uphethroli kuba ezakhelwe lowo msebenzi. Singaba uplastiki noma zibe yinsimbi kodwa kube ngeziqinile nezivaleka thaqa kungaphumi moya.
Amagalani asemthethweni okuphatha uphethroli ayatholakala ezitolo ezithile njengakoGame nasezitolo zamathuluzi noma sempahla yokukhempa. Kungalesi sizathu-ke sigcine sesifundisana nalaba babhemu abebedayisa okusaphethroli eceleni komgwaqo.
Nokho sigcine sithola ukuthi lesi sigubhu abasichwaneke esigxotsheni asiqukethe uphethroli kodwa siphethe umbhubhudlo we sweet aid benzela ukukhangisa kuphela. Sibachazelile-ke nokuthi uphethroli udinga ukubekwa endaweni epholile ngasosonke isikhathi ukuze ungaqumbelani.
Awuzwani nelanga uphethroli kanti futhi nezinhlansi awushayisani nazo. Sesisholo nalabo ababhemayo. Kuwo wonke umuntu osebenza ngophethroli okubalwa nabamabhizinisi okugunda utshani nabawisa izihlahla ngamagqalantoni kubalulelike ukuqikekela ukuthi uphethroli wabo bawugcine ngendlela ephephile ungamfimfisi umoya onesibabuli lapho uhleli khona.
Ngisho imithetho yasemagaraji ayibavumeli ukuthi bakuthelele esigubhini esingekho esimweni esifanele. Yingakho laba babhemu bakwaMnqobokazi sibelulekile ukuthi mabasebenzise izigubhu zamafutha emoto ngoba zona ziqinile kunalezi zamanzi, ezamafutha okupheka noma zeziphuzo ezinoshukela.
Yize kuyindaba engiphatha kabi kodwa mangikuveze ukuthi eminyakeni engu-40 edlule umama ongizalayo wayelekelela ubaba bekhanda imoto. Ngenxa yokuthi injini yayingekho emotweni umama wayebambe ujeke owawunophethroli eloku ewuchathaza kukhapharetha ngesikhathi ubaba ehlokoza isitati ngesikrudrayiva.
Okwenzeka injini yathimula maqede yakhafula ilangabi kukhapharetha kanti umama useduze nojeke kaphethiloli, wethuka wazithela ngawo emzimbeni. Ilangabi lavele lagxuma wokheleka washa kakhulu ezandleni, emzimbeni nasemilenzeni.
Kulapho-ke ngabona khona ubungozi bukaphethroli namanje angisikhohlwa leso sigameko yize ngangisemncane ngalowo nyaka ka-1978. Sibonga khona ukuthi yize ahlala isikhathi eside esibhedlela kodwa wasinda sekusele izibazi zokusha ezithweni.
Umbono wama-hazard uthi masilandele imigomo eqinile yokugcina uphethroli: 1. Masingawubeki elangeni 2. Masingawuhlalisi endlini ebaswayo 3. Masingawuphathi ngezigubhu ezithambile
4. Masingabhemi eduze kwawo nasemagaraji okwetha
5. Masingawubeki lapho ungabonwa khona izingane ngoba ubukeka njengesiphuzo esimnandi ngokombala kanti uyingozi.
Hhayi-ke sesiyawavala la ama-hazard ethu ngethemba lokuthi sonke sizwile futhi sizokuqikekela ukuphepha, siphinde sishayele ngokukhulu ukucophelela ukuze sihlangane sisawuphonsa umbalane nangesonto elizayo enyangeni entsha kuyo le ngosi yezezimoto kwelakho lodumo lokuwela umfula ugcwele.
Kodwa-ke uma ufisa siyiqhube le ndaba ngicela ungenqeni ukungena ekhasini lethu likaFacebook Igedlela lami with Sthembiso Shangase.
Yimi owenu nali ikheli ngezansi hazardiso@gmail.com