Lilokhu ligobhoza igazi losopolitiki
LIYAQHUBEKA nokugobhoza igazi kubulawa abaholi bezepolitiki KwaZuluNatal njengoba kubulewe uSihlalo weNFP oKhahlamba nowayengumholi we-ANC eMzimkhulu obesesebenzela umphakathi ngempelasonto.
INFP esifundazweni inxuse uNgqongqoshe wezamaPhoyisa kuleli uMnuz Bheki Cele ukuthi ajube amasosha njengoba zanda izehlakalo zokubulawa kwabaholi.
Leli qembu lisho lokhu kulandela ukubulawa kukaSihlalo weNFP oKhahlamba uMnuz Nkeni Mabaso (61) ngoMgqibelo emini odutshulwe amahlandla amaningi washonela endaweni yesehlakalo ephuma edolobheni eBergville.
Khona ngoMgqibelo ntambama kubulewe esinye isishoshovu ebesisebenzela umphakathi esake saba ngumholi we-ANC eMzimkhulu, uMnuz Nkosikhona Maxhakana (56), odutshulwe ngabesilisa abangaziwa ngesikhathi elungisa ugesi kuveranda wakwakhe.
UMabaso ubeyiphini likasihlalo kusoseshini wamatekisi iVulindlela.
USihlalo weNFP esifundazweni, uMnuz Vikizitha Mlotshwa, uthe bashaqekile ngoba uMabaso ubengelinye lamalungu agqamile kwiNFP.
Uthe ubesuka eBergville eya ewadini lapho iNFP izoba nomcimbi wesifunda abeyingxenye yabantu abawuhlelayo.
“Sikhathazekile ngezehlakalo zokubulawa kwabaholi esifundazweni. Sinxusa uMengameli Cyril Ramaphosa ukuthi ashaye umthetho wesimo esibucayi ngoba sekuyingozi kulesi sifundazwe. Sinxusa nongqongqoshe wesifundazwe ukuthi bakhulume namasosha ngoba ngeke siye okhethweni isimo sinje,” kusho uMlotshwa.
Udadewabo kamufi, uNkk Simangele Sikhakhane, uthe bagqemeke ingozi ngokufa kukaMabaso.
Uthe umufi ubehamba ngomgwaqo uBethany ehamba kancane njengoba kunezinciphisajubane kulo mgwaqo ngoba kuseduzane nesikole ngesikhathi enye imoto izama ukumdlula wase edutshulwa abebephakathi.
Uqhube wathi basola amatekisi ngokufa kwakhe ngoba ekuqaleni konyaka uke wamtshela ukuthi kukhona abafuna ukumbulala.
“Ngangifuna ukungena embonini wangitshela ukuthi kushubile ngoba kukhona abamshayela ucingo bemsabisa ngokuthi bazombulala. Njengoba ebeyiphini likasihlalo, kwabulawa usihlalo walo soseshini ngaphambi kokhetho lohulumeni basekhaya. Kwathatha omunye usihlalo naye obulewe kulo nyaka njengoba sekubulawa yena manje,” kusho uNkk Sikhakhane.
Umufi ushiye izingane zakhe eziyisithupha, umfana oyedwa namantombazane amahlanu, abazukulu nomkakhe.
Imizamo yokuthola umndeni kaMaxhakana ayiphumelelanga.
UNobhala jikelele we-ANC uMnuz Ace Magashule, ekhuluma nezintatheli njengoba bekuqhubeka umhlangano wesigungu esiphezulu sale nhlangano e-Irene, ePitoli, ugxeke izehlakalo zokubulawa kwabaholi.
Uthe amaphoyisa kumele abophe abenzi bobubi wathi ukubulala umuntu kusuke kuhambisana nobugebengu.
“Amaphoyisa awaphenye athathe izinyathelo ezifanele ngoba ukubulala kuhambisana nobugebengu.”
Okhulumela amaphoyisa, uColonel Thembeka Mbele, uthe akukaboshwa muntu mayelana nalezi zehlakalo, amaphoyisa aphenya amacala okubulala wathi nembangela yokubulawa kwabo ayikaziwa.
Khonamanjalo, ungcwatshiwe umholi weYCL kuwadi 103 KwaNyuswa uMnuz Mlondi Mazibuko owadutshulwa ngoDisemba.
IPhini likaNobhala loFasimba uMnuz Isaac Luthuli ebelikhuluma emngcwabeni kaMazibuko, lithe ngesikhathi edutshulwa amathumbu kamufi anqamuka kathathu kodwa wafike waya esibhedlela bazama ukuwalungisa.
“Siyakuzonda ukubulawa kwabaholi kungaba owe-ANC, NFP noma owaliphi iqembu. I-SACP kumele ivumele amalungu ayo ukuthi aqeqeqeshwe ukuze akwazi ukuzivikela kulabo abasuke befuna ukubasusa ngoba beshayisana ngemibono,” kusho uLuthuli.