Kusize izibalo zamakhansela i-ANC iketula i-IFP eNdumeni
BUCISHE bachitheka bugayiwe kumasipala waseNdumeni, eDundee ngaphandle kwesiFunda uMzinyathi ngemuva kokuba i-ANC izame ukuketula i-IFP ngokuba iqoke iMeya entsha.
NgoLwesihlanu amakhansela kaKhongolose aphakamise ukuba kube nomhlangano ophuthumayo wokuqoka iMeya entsha ngemuva kokuboshwa kukaMnuz Sboniso Mbatha.
UMbatha uboshwe ngoLwesithathu nekhansela laseMtshezi, uMnuz Mthembeni Majola nosolwa ngokuba inkabi, uMnuz Xolani Mkhwanazi ngezinsolo zokuhlela itulo lokubulala uSomlomo waseNdumeni, uNkk Bongiwe Mbatha.
Abethwele ngeqoma uMnuz Thulani Mahaye obeyiMeya ye-ANC kusaphethe uKhongolose neNFP kusuka ngo-2011.
Isinqumo sitatazelise amakhansela e-IFP ngoba izibalo bezivuna uKhongolose ngevoti.
“Kusize ukuthi sishayele ucingo ikhansela laku-ward 3, uMnuz Thabani Mlotshwa ukuba ashiye azosilekelela ukuze sibe nezibalo ezilinganayo ne-ANC. Ufikile washiya umkakhe obegula. Ukufika kwakhe kuphoqe ukuba umhlangano uhlehliselwe uLwesithathu. Le nto isiphethe kabi ngoba neqembu alicacisi ukuthi kufanele kwenziwe njani. Siyakhala ngoba kunjena nje ubaba uMfanje Mbango obesicindezela engahambisi izikhalo zethu ngemeya nosomlomo. Bebelwa njalo bebanga amathenda. Sigcine sesicela kuMbango ukuba avume sihlakazwe isiyingi kukhethwe isigungu esisha. Kunalokho uMbango ubethi uzosiphuca ubulungu uma siqhubeka nokukhuluma. INdumeni ibuyela kwi-ANC. Ngisho u-2019 siyowuzwa ngendaba uma kusenje,” kusho ikhansela elicele ukungadalulwa.
Ethintwa uMbango uthe unabo bonke ubufakazi bezincwadi abezihambisa ebuholini ngezinkinga zaseNdumeni.
“Abaholi baseNdumeni bagcine sebebizelwa esigungwini esiphezulu seqembu bakhuzwa. Ngisho imeya nosomlomo baze basatshiswa ngokuthi uma beqhubeka nokulwa bazosuswa ezikhundleni. Bayalelwa ukuba basebenzisane. Ngisho uMntwana waKwaPhindangene kade eseNdumeni kula masonto edlule wabanqumela ugwayi katiki wathi abayeke ukulwa basebenze ngoba uma kungenjalo bazogudluzwa ezikhundleni. Angilona iqembu ngakho angikwazi-ke ukususa abantu ezikhundleni. Abantu abayeke nje ukungisukela,” kusho uMbango
USihlalo we-IFP uMnuz Blessed Gwala uthe udaba lwaseNdumeni lubucayi kakhulu akulula ukukhuluma ngalo ungenayo imininingwane. Amaphoyisa ayaphenya lokho kwenza kube nzima ukuqophisana nophenyo lwamaphoyisa.“
Imizamo yokuthola amakhansela kaKhongolose ayiphumelelanga ukuze aziphawulele.
IMeya uMbatha neKhansela uMajola noMkhwanazi babuyela enkantolo yaseMtshezi ngoLwesine.