I-ANC izohlangana nabaholi ngolomhlaba
I-ANC izohlangana nabaholi boMdabu ngodaba oluthinta ukubuyiswa komhlaba ngaphandle kwesinxephezelo.
Lokhu kuvele emhlanganweni wesigungu esiphezulu se-ANC obubheka izinto eziningi, okubalwa kuzo nendaba yomhlaba, izingqungquthela okusamele zibe khona zezifunda okubalwa nezaKwaZulu-Natal ose-Irene, ePitoli.
“Sinomkhankaso iThuma Mina lapho sizonxusa ukuthi umphakathi uvolontiye usize abakhubazekile, abahluphekayo, njalonjalo. Sizokhuluma nabo bonke abaholi ngodaba lomhlaba. Umbono kaMotlanthe (Kgalema) ngendaba yomhlaba kwakuwumbono wethimba lePhalamende elalibheka indaba yomhlaba kodwa kungewona umbono wakhe noma owe-ANC. Miningi imibono ekhona mayelana nendaba yomhlaba,” kusho uMagashule.
UMotlanthe wanxusa i-ANC ukuthi igxile endabeni yobunikazi bomhlaba emakhaya nasemadolobheni.
Emhlanganweni obubheka indaba yomhlaba obungempelasonto edlule we-ANC, kunqunywe ukuthi umhlaba ubuyiswe ngaphandle kwesinxephezelo.
ISilo sixwayise i-ANC ngokuthi ingawuthathi umhlaba wabantu ngoba kuyochitheka bugayiwe.
UMagashule uthe ezinye izingqungquthela zizoqhubeka kulesi sifundazwe wathi ezinye ngeke ziqhubeke.
Kuzokhumbuleka ukuthi izifunda ezingakabi nayo ingqungquthela, okubalwa kuzo iMoses Mabhida, eke yaba nezinxushunxushu kunomhlangano walesi sifunda kwaqhunyiswa nezibhamu, iHarry Gwala, osekuphele isikhathi ingabi nayo ingqungquthela eke yagajwa izehlakalo zokubulawa kwabaholi neLower South Coast.
“Sizobhekana nendaba yokuvalelwa ngaphandle kwabantu nokunganikwa ubulungu. Uma sibona ukuthi isifunda asikakulungeli ukuthi sihlalise ingqungquthela ngeke siyihlalise ingqungquthela,” kusho uMagashule.
Uthe bazicubungulile izingqungquthela zezifunda wathi uma isifundazwe sesihlangabezanile nesibalo esibekiwe sokuthi singahlalisa ingqungquthela kumele iqhubeke.
“Udaba lwaseKZN siyalubheka. Ingqungquthela akuyona eyezifunda eyamagatsha esifundazweni. Sizothumela ithimba kulesi sifundazwe, hhayi ukuthi liye kulezi zifunda ezintathu kodwa ukuya nakwezinye izifunda ukuze kube nozinzo.”
Uthe bebebheka nendaba yokulungiselela ukhetho lukazwelonke ngonyaka ozayo.