UPandor ufuna kube nophenyo eNyuvesi yaseZululand
UNGQONGQOSHE weMfundo ePhakeme, uNkk Naledi Pandor, useyalele isigungu esilawula iNyuvesi yaseZululand, oNgoye, ukuthi sijube uphenyo oluzimele oluthinta imali enyuvesi.
UNkk Pandor ufuna kuphenywe izinsolo ezibhekiswe enyuvesi ezivezwe yizinhlaka ezehlukene.
Okhulumela uNgqongqoshe, uMnuz Lunga Ngqengelele, uthe uNkk Pandor uhlangane nesigungu senyuvesi ngoLwesihlanu ebusuku lapho bekubhungwa ngezinto ezehlukene.
Uthe umhlangano ubulandela ukuvakashela kwakhe enyuvesi ekuqaleni kwenyanga lapho ahlangana nezinhlaka ezehlukene, okubalwa kuzo nezitshudeni.
“Umhlangano nesigungu ngoLwesihlanu bekungowokubuyisa izimpendulo esigungwini senyuvesi emuva komhlangano aba nawo nezinhlaka ezehlukene. Sifuna kuphenywe zonke izinsolo ezivela emphakathini ezithinta inyuvesi, ukukhishwa kwamathenda, ukuqasha nezinto ezithinta ukusebenza kwemali,” kusho uNgqengelele.
Uthe uma sekuphothulwe uphenyo inyuvesi izobhekana nezinto ezizotholwa wuphenyo bese igeza igama layo.
Uqhube wathi uNgqongqoshe ukuvezile ukuthi uyazi abaholi benyuvesi basebenza kanzima ukulungisa izinkinga ezibhekene nesikhungo.
“Siyazi bayazama ukubuyisa isithunzi seziqu, esenyuvesi nokwethenjwa wumphakathi. Ngemuva kophenyo oluzimele kuzofakwa uhlelo lokubuyisa uzinzo nokuthuthukisa isikhungo.”
Ufisele inhlanhla isigungu senyuvesi njengoba sizobhekana nomsebenzi onzima ezinyangeni ezimbalwa ezizayo.
Uthe ubonga nokuzinikela kwesigungu esilawula ngokuzibophezela ukuthi lo msebenzi sizowenza ngaphandle kokwesaba.
Ngesikhathi evakashele okokuqala enyuvesi uNkk Pandor wakuveza ukuthi ubezothola ngazo zonke izikhalo ngaphambi kokunquma ngazokwenza.