Ushisa phansi umbango ezinkampanini zamaselula
SEKUSUKE umbango ezinkampanini ezimbili ezinkulu kuleli, enye yazo egweve nendathane yamakhadi amaselula nezinombolo zabasebenzi.
AbakwaMTN bamangalelwe ngabakwaTransnet ngenxa yamakhadi amaselula angu-13 400 okuthiwa abafuni ukudlulisa izinombolo zawo kwaVodacom. Lolu daba selufakwe eNkantolo eNkulu eGoli, abakwaMTN bame ekutheni inkontileka yabo nabakwaTransnet ayikapheli, yingakho bengakwazi ukubadedela baye kwaVodacom.
Umbango usuke emuva kokuba abakwaVodacom bephenywa yiKhomishini yezokuNcintisana, mayena nenkontileka kaR5.2 billion eyagunyazwa wumgcinimafa eminyangweni kahulumeni engu-20 ngo-2016. Okwenza abakwaTransnet bafune ukushintshela kuVodacom ukuthi umgcinimafa ubona ukuthi uzokonga ngaphezu kukaR3.44 billion.
AbakwaMTN abazithokozelanga lezi zindaba njengoba uVodacom kuyizimbangi zabo, abathi lokhu kuphambene nesivumelwano abasenza. AbakwaMTN basishaye indiva nesinqumo sangenyanga edlule se-Independent Communications Authority of SA (Icasa) sokuthi badedele izinkontileka zamaselula kubasebenzi abangu-65 000 bakwaTransnet. Lokhu kuthiwa sekuphazamise nokusebenza kwaTransnet njengoba ingakalungiseki indaba yezinkontileka zamaselula.
Encwadini ebhalwe nguSihlalo we-Icasa uMnuz Rubben Mohlaloga ngoMeyi 3, abakwaMTN banikwe izinsuku eziyisikhombisa ukudedela izinombolo zabasebenzi ziye kwaVodacom.
Okhulumela abakwaTransnet, uMnuz Molatwane Likhethe, uthe abakwaMTN basadedele izinkontileka ezingu-5 537. Kuthiwa ezinye izizathu ezibikwa abakwaMTN ukuthi bakweletwa uR40 million. Uphikile ukuthi banesikweletu kwaMTN, wathi le nkampani ihlulekile ukugcina izivumelwano.
UNkk Jacqui O’Sullivan okhulumela abakwaMTN ugcine engayiphendulanga imibuzo ayithunyelelwe yiphephandaba.
UMnuz Sipho Ngwema, okhulumela iKhomishini yezokuNcintisana, uthe lusaqhubeka uphenyo ngalolu daba, bazokhipha umbiko ngesinqumo uma sekuphothulwe uphenyo.
Embikweni wezezimali wangonyaka odlule abakwaTransnet bamemezele ukuthi bazimisele ukonga ngayo yonke indlela. Baveze ukuthi bonge uR2.4 billion ezindlekweni zezokuxhumana. Ngo-2014 iNkantolo eNkulu e-Eastern Cape yamisa ukukhishwa kwenkontileka kaR30 million yakwaMTN kuMasipala weNelson Mandela Bay Metro.
UMnuz Byron Kennedy, okhulumela abakwaVodacom, uthe abakwaMTN abazange basihloniphe isinqumo se-Icasa.