Kuvulwe neyesikhumbuzo kwelezintandane
SEKUZOFAKWA omatilasi ababamba umlilo emakhaya ahlala izintandane ukuze kungabi nezibhicongo uma uqubuka.
Lokhu kuvezwe nguMengameli weChild Welfare Durban and District uMnuz Rajan Pillay, ekhuluma ngemuva kokuvulwa kweLakehaven Child and Youth Care Centre, eSea Cow Lake eNewlands lapho okwasha khona izingane eziyisishiyagalombili ngoJulayi 2016 ngemuva kokokuqubuka komlilo zilele.
Ikhaya lakhiwe yiSibaya Trust etshale uR2.5 million ukulivuselela. Kwakhiwe nendawo yesikhumbuzo sezingane ezasha. Livulwe yiSilo samaBandla ebesimenywe ngusomabhizinisi uMnuz Vivian Reddy. Endaweni yesikhumbuzo kunamagama ezingane ezaphelela emlilweni.
“Kunezinhlelo zokuphepha ezikhungweni ukuze kungabi nezinhlekelele uma kuqubuka imililo. Masonto onke senze sengathi kuyasha bese sikhipha izingane ukuze silungiselele uma kwenzeka kuqubuka imililo. Sifake nezipontshi ezizobamba umlilo. Nakwamanye amakhaya sizokwenza okufanayo,” kusho uPillay.
Isikhungo esisha sinamagumbi okulala amane, indawo yokuphumula, ikhishi, nendawo yokugeza.
Uthi esikhungweni kunezingane ezingu-40. Selokhu kwasha abazange babe nezinkinga zokushoda kwendawo yokulala ngoba bezikhona ezinye izindawo zokuhlalisa izingane.
“Asikawuboni umbiko wokugcina ngembangela yomlilo okwashona kuwo izingane. Kodwa siyazi ukuthi idokodo linikwe abezokushushisa ukuze bathathe isinqumo,” kusho uPillay.
UPillay uthe ukuvulwa kwendlu kuhambisana nomgubho weminyaka engu-100 beyinhlagano.
UReddy uthe ukhulume namalungu ayingxenye yeSibaya Trust ukuze kufakwe isandla kwakhiwe lesi sikhungo.
“ITrust yanquma ukuthi lakhiwe kabusha ikhaya ngemuva kwale nhlekelele. Ziningi izinhlelo esisiza ngazo umphakathi njengoba sitshala nakwezemfundo.”
UNgqongqoshe wezokuThuthukiswa koMphakathi uNkk Weziwe Thusi ubonge iSibaya ngokwakha ikhaya.
ISilo sibonge uReddy ngokufukula isizwe sathi nabanye osomabhizinisi kumele bafake isandla ezinhlelweni zokuthuthukisa imiphakathi.
“Kumele sishintshe uhlelo siyosiza emakhaya ngoba baningi abantu ababhuqwa yindlala.”