Kuxwayiswa abafuna umsebenzi ngenkani
ISILO samaBandla sixwayise ngokuthi bazobaleka abatshalizimali uma beqhubeka labo abafuna ukudla imisebenzi yokwakha ngenkani.
UNgangezwe Lakhe uthe izwe libhekwe ngabomvu ngakho abantu bazolahlekelwa kakhulu uma kungukuthi abatshalibezimali bayabaleka.
“Wonke umuntu unezinselelo. Izwe libhekwe ngumhlaba wonke, sibhekwa izinto esizenzayo, ngakho uma kuqhubeka kwenzeka lezi zinto ezenzekayo, abatshalibezimali bazobaleka,” kusho iSilo.
Sikusho lokhu ngempelasonto ngesikhathi kuvulwa isikhungo esizohlala izingane eziwu-15 eLakehaven Child and Youth Care Centre, eSea Cow Lake, eNewlands, okwashona kuso izingane eziyisishiyagalombili ezasha zangqongqa kuqubuka umlilo zilele ngoJulayi 2016. Ikhaya lakhiwe yiSibaya Community Trust yempunyela yaseThekwini, uMnuz Vivian Reddy.
Isilo sisho lokhu emuva kokugasela kosomabhizinisi abaphazamise ukwakhiwa eMhlanga Ocean ephethwe nguReddy befuna umsebenzi.
“EMafikeng bebebhikisha bekhala ngobenguNdunankulu bashisa izinto. Kumele esikwenzayo sikwenze sibheke ukuthi siyabukwa ukuthi senzani.”
UReddy uthe uyahambisana nokuthi osomabhizinisi abamnyama balwele ukuthola amathenda kodwa akahambisani nendlela abenza ngayo.
Uthe unqume ukuthi angabalwisi kodwa asebenzisane nabo. “Uma ubheka izinkampani zabamnyama namaNdiya zishiywa ngaphandle uma kwakhiwa izinxanxathela zezitolo wonjiniyela abamhlophe. Nginqume ukuthi ngibacathulise osomabhizinisi abafuna umsebenzi ngenkani, ngingalwi nabo ukuze bagcine sebephumelele,” kusho uReddy.
Uthe bazoba abangani bakhe ngoba kumele kwenziwe izinguquko ezinqala kwezomnotho.
UNdunankulu wesifundazwe, uMnuz Willies Mchunu, uxolisile ngokwenzeke kuReddy kugasela osomabhizinisi ngenkani befuna umsebenzi wokwakha.
Uthe akumele kuvunyelwe kube nabantu abazochanasa esifundazweni baphazamise izinhlelo zokuthuthukisa isifundazwe.
“Sinxuse uMengameli ukuthi angenelele, akhulume namaphoyisa ngoba aphethwe kuzwelonke ukuthi kungani abantu bezenzela umathanda. Sesiqale imihlangano ngalesi sihlava. Sizoqhubeka sibhunge ngalezi zinto.”