Uqophe umlando umasipala ohlanganisiwe
UQOPHE umlando umasipala iRay Nkonyeni Ogwini oluseNingizimu yeTheku ngokuba ngumasipala ohlanganisiwe othole umbiko wezimali ongenagcobho.
Lo masipala wakhiwe omasipala abahlanganiswa iHibiscus Coast nowaseZinqoleni wase ubizwa ngeRay Nkonyeni ngemuva kokhetho lohulumeni basekhaya ngo-2016.
UMnuz Max Mbili, imenenja yalo masipala, uthe wunyaka wesibili selokhu kwabunjwa lo masipala bethola umbiko ongenagcobho ezimalini.
Usho lokhu nje ngeledlule uMcwaningi Mabhuku Jikelele, uMnuz Kimi Makwetu, udalule ukuthi inqwaba yomasipala ithole imibiko engemihle yezimali.
UMbili uthe ukuba nezinhlelo eziqinile zokubheka izinhlelo zokusebenza kwemali nokuhlola yikhona okwenza bathole imibiko emihle minyaka yonke.
“Sinohlelo oluqinile lwangaphakathi lokuthi sibheke ukuthi izimali zisebenza kanjani. Lolu hlelo kumele uluhloniphe uzilandele izincomo zalo ngoba abantu abenza ucwaningo ngaphakathi bayazibona izinto uma zingahambi kahle. Uma uzilandela lezi zinhlelo nakanjani uthola umbiko omuhle. Uma kukhona iziphakamiso eziphumayo ngaphakathi siba nohlelo lokubhekana nalokhu okusuke kuthiwe asikubheke, sibike inyanga nenyanga ngesesikwenzile ukuze sihlangabezane nalezo zikhalo,” kusho uMbili.
Uthe noma sekufika umcwaningi mabhuku omkhulu bayazilandela bazenze izinto asuke ekhale ngazo.
“Kunanekomiti eliholwa yimina njengomphathi womkhandlu elibheka izinto okumele zilungiswe. Sinekomiti elibheka nokusebenza kwemali elifana neScopa esiShayamthetho esilandelela izincomo zalo,” kusho uMbili.
Uthe labo abangenzi kahle bathathelwa izinyathelo wathi bayabaklomelisa labo abenza kahle ukuze bagqugquzeleke baqhubeke nomsebenzi omuhle.
Akaqali ukuthola umbiko omuhle wezimali ngoba esaphethe umasipala waseHibiscus Coast wathola imibiko emithathu emihle yezimali, wathola nowodwa ongenagcobho.
“Umasipala wethu uqophe umlando kuleli uma ubheka omasipala abahlanganiswa njengoba kuyiwona wodwa othole umbiko ongenagcobho wokusebenza kwezimali. Akulula ukuphatha umasipala osuke uhlanganiswe nomunye ngoba kusuke kunezinto eziningi futhi kumele uqinisekise ukuthi izidingo zomphakathi zihambisana nesabelo sezimali,” kusho uMbili.
Mayelana nesabelo sezimali uthe bathole uR1.1 billion wathi imali abanikwa yona bayisebenzisa yonke ayikho ephindela emuva.
“Ngonyaka odlule siyisebenzise yonke imali sihambisa intuthuko kubantu. Nakulo nyaka sizoyisebenzisa yonke njengoba sesingaphezulu kuka-90% wemali esisebenzile. Siyayihambisa intuthuko njengokwakha amahholo, izinkundla zemidlalo nezinye izidingo kubantu,” kusho uMbili.
Uthe emadolobheni bahlushwa yindaba yemigodi emigwaqweni wathi yingakho sebenohlelo lokuthi okungenani bayiqale kabusha imigwaqo ngoba ngesikhathi uhulumeni owawuphethe uyakha imigwaqo wawungacabanganga ukuthi zizoba ziningi izimoto ezihamba kuyona yingakho behlala belungisa imigodi bese iphinda ibe khona.
Uthe bewumkhandlu banohlelo luka-2036 lokuthuthukisa umkhandlu wathi ngemuva kweminyaka engu-20 kumele ube usukwelinye izinga.
UMbili uthe kubalulekile ukuthi abaholi komasipala bazi ukuthi bafunani babheke nendlela abakhuluma ngayo izinto ukuze imikhandlu ithole imibiko emihle yezimali.
UMbili ufike eHibiscus Coast ngo-2013 kanti wayesuka eLangeni TVET College engumphathi waleli kolishi elalithola umbiko omuhle wezimali kusukela ngo-2007 kwaze kwaba ngu-2011. Washiya kuleli kolishi ngo-2012.