Izindondo kubasebenzi abenze kahle
BAGUBHE usuku lokuvuselelwa kwe-Afrika ngezindondo abasebenzi boMnyango wezokuThuthukiswa koMphakathi KwaZulu-Natal, abebeklonyeliswa uNgqongqoshe uNkk Weziwe Thusi ngoLwesihlanu.
Bebevunule beconsa ngemvunulo yesintu emcimbini obizwa ngeMEC’s Excellence Awards obuhambisana ne-Africa Day. Umcimbi wenziwa minyaka yonke ukugqugquzela ukusebenza ngokuzimisela kubasebenzi bomnyango abangenela eminxeni ehlukene.
Ungqongqoshe obehambisana neNhloko yoMnyango, uNksz Nokuthula Khanyile, ukhuthaze abasebenzi abangakangeneli ukuthi bakhuthazeke ngokuzayo. Ukhale ngokuthi yize bebaningi abangenelayo minyaka yonke kodwa akukafiki ezifisweni zakhe.
“Ngiphoxekile ngendlela izinga eliyiyo kwabangenelayo ngoba akukafiki lapho ngifisa khona. Inhloso wukuthi kuklonyeliswe abenza kahle ukuze kukhuthazeke nabangakafiki ezingeni labo. Ngibashayela ihlombe bonke abangenele nabaphumelele abazosimela kahle kumaPremier’s Awards,” kusho yena.
Uveze ukuthi bangu-21 abangenele emunxeni weBest Team of The Year kwathi kwiBest Implemented Project of the Year kwangenela abangu-30. Le minxa ikweyisithupha obekwahlulelwa kuyona.
UNksz Novuyo Zimu oyimenenja yesikhungo iGreenfields, owadla umhlanganiso ngonyaka odlule, ukhuthaze abasebenzi wathi bazikhandle. Uthe esanda kuqala ukungenela wathola izindondo zesiliva, wabuye wangenza kahle.
“Ngike ngaphelelwa yithemba ngafisa nokuyeka ukungenela ngingasawini. Ngabuye ngazindla ngokuthi kungani ngingaphumeleli. Kwadingeka ukuthi ngibheke amaphutha engiwenzile ngivume nokuthi yimina engibe nomthelela. Lokhu kwenze ukuthi ngigcine sengiphumelela kahle,” kusho uNksz Zimu.
Obethula umbiko wamajaji, uMnuz Zamokuhle Mchunu, uthe bekunzima ukuhlunga ngenxa yendlela bonke abasebenze kahle ngayo. Uthe ukube kuya ngamajaji bebezothola imiklomelo efanayo kodwa kumele kube khona abaphuma phambili. Uncome ukuthuthuka kwezinga kwabangenele athe bebeqonda kahle ukuthi yini edingekayo.
Akuklonyeliswanga abasebenzi abenze kahle emsebenzini kuphela kodwa nabakwezemidlalo.
Kuhambe kanje eminxeni ehlukene.