‘Akuliwe nokungatholi umsebenzi kwentsha’
KUDINGEKA indlela entsha yokulwa nesihlava sokungasebenzi kwentsha emuva kokuba zivezwe obala engqungqutheleni ye-African Renaissance izizathu ezenza zikhule izibalo zokungasebenzi kwayo.
Izikhulumi ebezishiyelana inkundla engqungqutheleni ephele ngoLwesihlanu eThekwini, zithe sekuyisikhathi sokuthi kubhekwe ezinye izindlela kunokukhiqiza izitshudeni ezizohlala emakhaya neziqu.
UMnuz Sibusiso Mngadi, iManaging Director yeBellewether LTD eKenya, uthe ngeke iphele inkinga yokungasebenzi kwentsha uma kungekho okwenziwayo. Uthe kumele intsha ingawabukeli phansi amanye amathuba omsebenzi.
“Inkinga kuleli wukuthi sikhiqiza intsha ephuma neziqu ilinde ukuyoqashwa. Kumele sikhiqize abantu abazophuma emanyuvesi sebenomqondo webhizinisi abazoliqala. Uma sisakhiqiza abafuna ukuqashwa ngeke iphele inkinga yokushoda komsebenzi, ngisho umnotho wezwe ungathuthuka,” kusho uMngadi.
UMngadi uthe akhona amathuba amabhizinisi eNingizimu Afrika kodwa kwesinye isikhathi intsha iwabukela phansi.
“Akudingeki uze uqale ibhizinisi elikhulu ukuze uphile kodwa imali ungayenza ngomsebenzi obukeleka phansi. Ungaziqalela ngokupholishela abantu izicathulo noma ubacwale ubuso noma yikuphi lapho behlangene khona. Abokufika abanqeni ukuthatha noma yimaphi amathuba yingakho bephumelela ezweni lethu,” kusho uMngadi.
UNkk Lindiwe Khuzwayo oyiNhloko yakwaHuman Resources KwaSapref, uthe kunemisebenzi ebukeleka phansi nengcolisayo kodwa abayenzayo baphila kahle. Ugcizelele ukuthi kumele intsha ihehelwe kule misebenzi okugqokwa kuyo amabhuzu nomakalabha.
“Izibalo zikhomba ukuthi intsha eningi ayisafesi ngoba isilahle ithemba. Ngo-2003 bawu-1.1 million abaqale ikilasi likaGrade 1 kodwa balinganiselwa ku-500 000 kuphela abafike ku-matric. Kumele sikuveze lokhu ngoba kungesinye sezizathu ezenza intsha ingaqasheki,” kuchaza uNkk Khuzwayo.
Uthe intsha akumele izibambezele ngemisebenzi ebinedumela kudala ngoba isimo sesishintshile. Uveze nokuthi umnotho ngeke uye ndawo uma bengathuthukiswa abesifazane.
UDkt Tashmia Ismail-Saville, isikhulu esiphezulu kwaYouth Employment Services, uthe ziyashaqisa izibalo zentsha engasebenzi. Uthe iwu-6 million engasebenzi, u-56% wayo ukulungele ukusebenza kodwa awunawo u-matric. Uthe u-1 million awunazo iziqu namakhono. Lesi ngesinye sezizathu ezenza ingasebenzi. Ingqungquthela ye-African Renaissace ibihambisana nenyanga yokuvuselela ubu-Afrika.