Utuse ihhashi lakhe ohlabane ngoR16 000
UHLABANE ngoR16 000 umlisa wase-Utrecht ophume phambili emjahweni womtelebhelo wamahhashi iNkandla May, obuseDengwane, eNkandla ngoMgqibelo.
UMnuz Siyabonga Mabaso (24) uncome ihhashi lakhe u-Album ngokudlisela ogageni amanye amahhashi kulo mqhudelwano obungowonyaka wesine.
Uthe ngonyaka odlule waphuma isibili okwamenza wabona ukuthi uma engabhukula angagoduka nalesi sicoco kulo nyaka.
“Ngiswele amaphiko okundiza ngendlela engijabule ngayo. Ngiqale ukugibela amahhashi ngisemncane kodwa ngiqale ukungenela imijaho ngineminyaka eyisishiyagalolunye. Ngifisa lo mdlalo womtelebhelo wamahhashi uthuthuke ugcine usufana nomjaho omkhulu, iDurban July nathi sigcine sesiziphilisa ngakho ngokugibela amahhashi,” kusho uMabaso.
Uthe nomakanjani ngonyaka ozayo uzobuya kulo mdlalo azovikela isicoco sakhe.
Yize bebengebaningi abebedle ingqephu njengokujwayelekile uma kunomjaho wamahhashi kodwa kukhona iqeqebana labantu ebelizimisele impela.
UNksz Fikile Mswane (32) waseZimpisi khona eNkandla ubekubantu abebeswenkile.
“Kungokokuqala ngihambela lo mjaho. Bengihlale ngizwa ngawo emsakazweni ngifunda nangawo emaphepheni. Kulo nyaka ngizifikele qathatha ukuzozibonela. Ngikujabulele ukuba yingxenye yawo, bekumnandi impela. Ngiyajabula ukubona imicimbi emihle yenzeka nangakithi, kubonisa ukuthi nathi Nkandla asimcinyane,” kusho uNksz Mswane.
Imeya yaseNkandla, uMnuz Thamsanqa Ntuli, ithe bafisa lo mjaho ukuthi uqhubeke nokuheha abantu bakwezinye izindawo.
Uthe usuqalile ukuheha abatshali zimali njengoba besanda kuvula isitolo uKFC kanti ngoMeyi 31 bazovula isitolo uShoprite.
“Inhloso yethu wukuthuthukisa indawo yethu sidale namathuba omsebenzi kubantu. Kulo nyaka sinyukile isibalo sabaxhasi, lokho kusijabulise kakhulu ngoba lo mjaho usaqala ubuxhaswe ngumasipala kuphela. Sesizokwazi ukonga imali yabakhokhi bentela. Sifisa lo mjaho ukhule ngokuhamba kwesikhathi njengoba okwamanje usengumjaho okungenwa kuwona mahhala,” kusho uNtuli.
Abadayisi bendawo bebehleka bodwa njengoba abantu bebephume ngobuningi babo bezobukela umjaho.