Ingcindezelo yabesifazane ijulile nesimo siya ngokushuba
INKULULEKO yesizwe ngeke yapheleliswa ngaphandle kwenkululeko yabantu basifazane. Abantu besifazane bawumgogodla wesizwe, ngaphandle kwenzalabantu isizwe siyashabalala. Inzalabantu iyona emise imindeni, emise imiphakathi nesizwe sonkana; yingakho kuwumsebenzi wesizwe sonkana ukuvikela abantu besimame.
Sekuqala ukuba yinsakavukela umchilo wesidwaba ukubulawa kwabantu besifazane ikakhulukazi abasebancane. Okwethusayo wukuthi babulawa ngabantu abasondelene kakhulu nabo nokuyilabo okufanele babavikele Sekufika lapho sizibuza khona ukuthi abantu besilisa bangabantu impela noma yizilwane nje zasendle ezilambele igazi lenzalabantu? Ukuhlukunyezwa kwabantu besifazane kuwubulwane esingenakubuhloniphisa noma sibucashise. Kukaningi abantu besifazane beba sesimeni lapho bezizwa besephutheni ngezigameko ezibehlelayo mihla namalanga.
Abadlwengulwayo kuthiwa basuke bengagqokile ngendlela eyiyo, noma bagqoka ngendlela yokuheha abantu besilisa. Ababulawayo nabashaywayo kuye kuthiwe bagangile. Kuhlala kuba khona izizathu ezithile ezibekwa ngabantu besilisa ukuze kuzobukeka sengathi iphutha likumuntu wesifazane. Impela okwavelela abantu besifazane akufani nokwamuntu! Asikho nesisodwa isizathu esinika owesilisa igunya lokubeka isandla umuntu wesifazane. Ayikho nencazelo engazwakala yalobu bulwane osebudlangile ezweni.
Ingcindezelo yabantu besifazane ijulile. Kuqala kancane emakhaya. Sikhule kuthiwa umuntu wesilisa unamandla ngaphezu kowesifazane. Indlela okukhuliswa ngayo izingane emakhaya nayo inawo umthelela ezintweni ezenziwa ngabantu sebekhulile. Uma ingane ikhula ekhaya lapho ubaba eshaya umama aze ambize ngamagama, iyalimala emqondweni. Ikhula yazi ukuthi umuntu wesifazane yinto yokushaywa.
Ukuhlukumezeka kuqala kancane. Abantu besifazane kumele bafunde ukuzimela baphume ebudlelwaneni obungenakuthula nobugcwele udlame. Uma umuntu ozwana naye eke wakubeka isandla; maningi amathuba okuthi akuphinde noma enze okungaphezu kwalokho.
Kunzima ukulekelela abanye besifazane ngoba bayakufihla ukuhlukunyezwa ababhekana nakho. Kuba nzima ukusiza umuntu ongaboni ukuthi unenkinga. Uthando akumele lube nzima; ezentokozo kuphela izinyembezi ezimelwe ukuphuma uma usothandweni. Kumele abantu besifazane babike uma behlukumezeka ukuze sizolwa nalesi sihlava esihlasele izwe lethu.
Isizwe kufanele sibe yimbumba ukulwa nalolu dlame oludlangile ezweni. Abaholi bonkana kumele bahlangane ukulwa nalesi simo esibhekene naso ngoba singeze sayinqoba le mpi singabumbene. Abantu besifazane kumele bahlangane bonke ngothi lwabo, abamasonto ahlukene, abamaqembu ezepolitiki ahlukene, noma ngabe yikuphi ngoba lolu daba lusithinta sonke.
Mayihlangane imbokodo yonkana igaye icoboshise lobu bulwane. Isigwebo sabenzi bobubi sincane kakhulu.
Uhulumeni kumele alusukumele udaba engeze isigwebo sabo bonke abatholakala benecala lokushaya, ukunukubeza ngokocansi nokubulala abantu besifazane. Isigwebo esitholwa yilezi zinswelaboya sincane futhi senza thina njengabantu besifazane sehluleke ukwethemba ezobulungiswa bezwe.
Akukho okunganqoba le mpi ngaphandle kwezwi eliyimbumba lenzalabantu. #SEKWANELE
USizophila Ntwenhle Mkhize uyilungu lesigungu sikazwelonke se-ANCYL ubhala njengesakhamuzi saseNingizimu Afrika