Sifana nabantu abangakhululekile ezweni lethu
MHLELI: Ngicela isikhala ngibeke umbono wami ngenkinga ebhekene nabafowethu nodadewethu abahweba ezindaweni ezisenyakatho yeTheku kungebona bodwa nezwe jikelele. Lokhu ngikuzwe kuKhozi FM kweZanamuhla.
Ngokwami kunephutha elenziwa abaholi bezepolitiki. Ngenkathi kusaliwa nabacindezeli asitshelwanga amaqiniso ngenkululeko. Satshelwa ngobuhle bayo sangatshelwa ngobubi, izingqinamba nezinselelo eziza nayo. Ngenkathi besekudingisweni sasazi ukuthi basezinkanjini zalawo mazwe ayebakhoselisile, okusho ukuthi babengababaleki. Abakaze basitshele ukuthi babehweba, abakaze basitshele ngezivumelwano abazenza namazwe ababekhoseliswe kuwo egameni labantu beNingizimu Afrika. Kuthe uma likhululeka elengabadi kwathiwa leli elabo bonke abahlala kulo. Ukuthi kwakusho ukuthini akuzange kucaciswe. Emva kwaleyo nkulumo kwatheleka abantu besuka kwamanye amazwe e-Afrika nase-Europe. Kwenzeka konke lokhu nje asikaziboni izithelo zenkululeko besisanambitha singakazidli izithelo zomzabalazo wethu ma-Afrika.
Batheleka nje asikazi lutho ngokuhweba okukhululekile nokuncintisana ngokuhweba. Bona bese bazi kabanzi ngalesi simo kanti nokuqeqeshwa emikhakheni ehlukene kwezempilo thina asikutholanga, lokhu osekusidalela izinkinga namuhla. Uma ngingaphosisi alikho izwe elenza iphutha elenziwa yiNingizimu Afrika ngokuthi ithi iqeda ukuthola inkululeko bese ivula imingcele kube uthela wayeka kuhle koThukela lungenisa. Ngelinye iphutha elenziwa abaholi bethu sebethatha izinqumo bodwa thina singaziwa nokuthi siyini ezweni lokhokho bethu. Elesibili abokufika bangena njengababaleki gwiqiqi banikezwa amalungelo okuhweba babe nezinhlangano ezilwela amalungelo abo.
Asazi-ke noma abaholi bethu babenawo yini la malungelo ekudingisweni. Ngenkathi la mazwe ekhululeka kasizange silishiye elokhokho sahlala sabhekana ngqo nomcindezeli, ngisho nangesikhathi sodlame lwezepolitiki sahlala sabhekana nalo lwaze lwaphela.
Ngicela bangangizwa kabi abafowethu nodadewethu kuphela ngihlushwa yisililo sezingane zakwethu isithukuthuku sazo esesiphelele eboyeni kuhle kwesenja, sebethathiswa okweziwula bebe bengahlonyiswanga ngezikhali ezifanele ukubhekana nempi yezomnotho ezweni elikhululekile. Angibazondi abokufika kuphela abaholi kababanga nobulungiswa.
Ngeke uthi ngoba umakhelwane wakusiza wakukhoselisa nezingane nidilikelwe yindlu bese uba yisigqila sakhe kunoma yini oyenzayo. Uma kukhona abanyatheleke amakhona ngombono wami yobe, angiqonde bubi kuphela siyavusana. Petrus Radebe ENEWCASTLE