Sididekile ngelungu lomndeni elihlushwa yisifo sokuwa

MHLELI: Asisazi ukuthi sizoyenzenjani indaba yelungu lomndeni eliphila nesifo sokuwa elisazukwa wukudlula kuGrade 5 esikoleni samabanga aphansi ngenxa yokufeyila.

Into eyenza afeyile wukuthi ugula njalo ngenyanga kuyenzeka ahlale amasonto amabili ekhaya engayi esikoleni. Uzimisele ngesikole futhi uyasithanda inkinga wukugula njalo.

Nezingane seziyamhleka ngoba mdala kunazo zonke. Sicela usizo ngoba nempesheni yakhe yavalwa nakuba lokhu kugula sekwamenza walahlekelwa wumqondo. Impesheni bayivala bathi usindile kodwa lokho kuyaxaka ngoba thina esihlala naye asikuboni lokho kusinda abakushoyo.

Sicela niwuhlabe niwulawule. Ngisho kungabuzwa kuthishomkhulu wesikole afunda kusona angafakaza futhi nomphakathi uyalwazi udaba lwakhe.

Sicela izimpendulo ngokuvalwa kwempesheni yakhe. Uma ikhona indlela sifisa atholelwe nesikole angafunda kusona sabantu abanenkinga ecishe ifane neyakhe.

Kuyimanje uyagula yisonto lesibili leli engayi esikoleni. Inkinga wukuthi asikwazi ukumyisa esibhedlela uma egula ngoba imali ayikho akekho umuntu osebenzayo ekhaya.

Siyazi ukuthi lukhona usizo lwe-ambulensi uma niyidingela isiguli kodwa inkinga iba sekutheni kuzobizwa i-ambulensi kuthi uma sekumele kubuywe kudingeke imali yokugibela le esuke ingekho. Ngenxa yalokho ugcina engayiswanga esibhedlela.

Kodwa ukugula kwakhe akubuzwa uzibonela ungatshelwanga. Enye inkinga wukuthi munye udokotela okhona okumele uye kuyena uma ufuna impesheni kanti uyabiza ngoba kukhokhwa uR300.

Sicela usizo ukuze ezokwazi nokuthola imithi aphinde athenge nokudla okufanele ngoba kuningi ukudla okungamele akudle. Uma ingabuya imali yakhe sifisa nokumyisa esikoleni esizomfundisa ikhono alithandayo ukuze akwazi ukuziphilisa ngalo ngoba esikoleni usesele kakhulu kunzima ukuthi angaqeda. Phindokwakhe Mvundla