Wamilwa wuhlevane eqokelwa kwesiphezulu
“USUKU engathola ngalo ucingo lungazisa ukuthi ngizoba yisikhulu esisha seNkamva Youth ngamilwa wuhlevane, angisoze ngalukhohlwa.”
Lokhu kushiwo uNkk Lungile Zakwe, oqokwe ngesonto eledlule ukuthi abe yisikhulu esisha senhlangano esiza intsha ngezinsiza kufunda okubalwa kuzo ukubasiza ngezifundo zeMaths neSayensi nangemali yokungena emanyuvesi.
Ubekhuluma emcimbini obuseWiggins Hall, eChesterville ngoMgqibelo.
Lo mcimbi oba minyaka yonke kusuka ngo-2012, ubheka ukusebenza kwabaphathi beNkamva nokuthi abafundi bayasizakala yini ngohlelo lwabo, nokubheka ukuthi imali isetshenziswe kanjani onyakeni ophelile. Kuwona umhlangano kuphinde kwaqokwa amalungu amasha ebhodi enhlangano.
UNkk Zakwe ugqugquzele abafundi nabazali ngemfundo, wathi yiyona ndlela abafundi abangazikhipha ngayo enhluphekweni.
“Bafundi nani bazali ngifisa ukusho ukuthi imfundo iyona eshintsha impilo yakho, ikukhiphe ekuhluphekeni. Imfundo iphinde ilethe ushintsho, hhayi kuwena kuphela kepha nakubazali nomphakathi wakho,” kusho uNkk Zakwe.
UNomfundo Masinga (20) oyisitshudeni esisizwa yilolu hlelo ubonge inhlangano ngokumsiza ngokumngenisa enyuvesi.
“INkamva yangisiza ngisesemabangeni aphezulu ngeMaths neSayensi okwakunginika inkinga, yangitholela ozongicathulisa. Yangisiza ngokungibekisela isikhala eMangosuthu University of Technology (MUT), lapho engangenza khona izifundo zeMarketing,” kusho uNomfundo.
Uthe usebuyisela emphakathini nakwiNkamva Youth njengoba esengomunye wabafundisa abafundi bamabanga aphezulu ezinye izifundo ezibanika inkinga.
Umzali onengane esizwa yiNkamva ngezifundo zayo, uNksz uLouissa Mbhele, uthe uyalubona ushintsho enganeni yakhe njengoba yaqala ukucathuliswa ngezifundo yile nhlangano.
“Inkamva uhlelo olusisiza kakhulu singabazali ngoba asikwazi ukusiza izingane zethu ngama-homework ngoba abanye bethu abenzanga izifundo bona abazenzayo. INkamva isiza nangokunika izingane imifundaze yasemanyuvesi.” kusho yena.