UHunt uvuselele inkontileka kwiClever Boys
UVUSELELE inkontileka yakhe kwiBidvest Wits umqeqeshi waleli qembu uGavin Hunt. Izindaba zizwakale ngaye uHunt.
Inkontileka kaHunt neClever Boys ibiphela ngoJuni. Lo mqeqeshi ufike kwiWits ngo-2013 esuka kwiSuperSport United.
KwiClever Boys usenqobe izicoco ezintathu. Uhlabane ngesicoco se-Absa Premiership, MTN 8 neseTelkom Knockout.
“Ngiyahlala kwiWits, inkontileka yami ngiyivuselele. Sekunezinyanga ngiyivuselele. Ngeke ngisho ukuthi ngiyivuselele ngeminyaka emingaki kodwa ngiyivuselele,” kusho uHunt.
Kule sizini esanda kusongwa ezikaHunt azenzanga kahle. Ziqede ngaphandle kweTop 8 yize zikwazile ukunqoba isicoco seTelkom Knockout.
“Kube yisizini embi kithina. Ngesizini ezayo kumele sibuye ngamandla. Njengawo wonke amaqembu sizongena emakethe ukuze siqinise iqembu,” kusho uHunt. Lolu qweqwe lomqeqeshi seluzakhele igama ngokudla izicoco lapho lufika khona. KwiSuperSport wanqoba izicoco ezintathu zeligi neseNedbank. Njengamanje uHunt uphethe irekhodi lokudla izicoco eziningi nezingwazi ezifana noTed Dumitru ongasekho emhlabeni noGordon Igesund. Bobathathu bashaya ngezicoco ezine zeligi abazinqobe emaqenjini ahlukene. “Ziningi izinto ezibe nomthelela ekutheni singabi nesizini enhle. Sizolwa nokuzilungisa. Ngicabanga ukuthi nokungabi yingxenye yamaqembu azobe egijima emiqhudelwaneni yeCAF kuzosinika ithuba lokuthi sigxile emidlalweni yasekhaya,” kusho uHunt. UHunt useke waqokwa amahlandla amane njengomqeqeshi ovelele kwiPremier Soccer League (PSL). Eminyakeni eyedlule uke wamataniswa neKaizer Chiefs engenaye umqeqeshi kodwa ukuvuselela kwakhe inkontileka kucacise ukuthi ngeke abonakale kuMakhosi.
ULuc Eymael weFree State Stars ukhona ohlwini lwabaqeqeshi abaxoxa neChiefs.