UMntungwa ufuna ukuphatha esaseMzansi
ULOBIZELA ukuphatha isicoco saseNingizimu Afrika umshayisibhakela waseCato Ridge, u-Andile Mntungwa, ozibona esehanjelwe yisikhathi kwezamankomane.
UMntungwa ubengomunye wabashayisibhakela abathembisayo eNingizimu Afrika kodwa wahlulwa ezimpini abekade ebhekwe kuzona kakhulu. Ugcine ukungena eringini ngoMashi ehlula ngomcacamezelo womlalisa phansi uYanga Phetani empini ebikade ikwaXimba Sports Hall.
UMntungwa uhlale cishe iminyaka emibili engangeni eringini emuva kokuboshwa kwakhe ngecala lokubulala nokuphazamise amaphupho akhe.
Uthe usefuna ukuphatha isicoco se-SA middleweight esingaphethwe muntu okwamanje kuze kuba umpetha uBarend van Rooyen uyaphuma enkingeni yokutholakala kwesikhuthazi emchameni wakhe. UVan Rooyen uyaphikisana nesinqumo seBoxing South Africa sokumumisa esibhakeleni.
“Sengifuna isicoco saseMzansi manje. Sengimoshe kakhulu isikhathi. Sekufanele ngisebenze ngokuphindiwe.”
UMntungwa uzobhekana noWade Groth empini ezoba se-Emperors Palace ngoJuni 23. Impi ingenye yezihlelwe yiGolden Gloves kaRodney Berman. UGroth, obekade elwa kwi-Mixed Martial Arts, usaziwine zonke izimpi eziyisihlanu asazilwe esibhakeleni esikhokhelayo. Usevele uhlelelwe enye impi ye-interim SA ngoAgasti 10 noWynand Mulder. “Usevele ubashayile abanye abashayisibhakela abangekho ezingeni eliphezulu. Nakuba esewine ngomngqimuzo womlalisa phansi izimpi ezine kweziyisihlanu kodwa angibuboni ubungozi bakhe,” kusho uMntungwa. UMntungwa (4-3-1) uqale isibhakela eqeqeshwa ngu-Alex Mchunu, uyise kampetha we-SA cruiserweight, uThabiso Mchunu. Ulandele uThabiso wazilolonga ejimini yezelamani zakwaSmith, uPeter noSean, nokuyikhona okungenzeka ukuthi kube nomthelela ekutheni athole impi kwiGolden Gloves. Ngo-2014, uphume eDurban International Convention Centre evaleke iso emuva kokushaywa kabuhlungu nguJarred Silverman.