UShopane ethubeni lokunyukela kwelikhulu
UTHEMBISA ukungalidedeli ithuba lokudlala eqenjini elikhulu leKaizer Chiefs uma livela u-Itumeleng Shopane ongomunye wabadlali abagqamile esikwatini seMultichoice Diski Challenge (MDC) ngesizini edlule.
UShopane (20) uqokelwe emunxeni womdlali ovelele kwiDiski Shield emiklomelweni yokuphela kwesizini yePremier Soccer League (PSL).
Ubanga nozakwabo uMoses Christian noPromise Mkhuma weMamelodi Sundowns. Umcimbi ukusasa eSandton Convention Centre, eGoli.
IChiefs izibule ngesicoco seDiski Shield obekungokokuqala ukhona lo mqhudelwano wamaqembu adlala kwiMDC.
Ihlule iMamelodi Sundowns ngo 3-1 kowamanqamu.
Ebuzwa ukuthi uwabona enjani amathuba okudlala eqenjini elikhuku, uthe: “UNkulunkulu owaziyo ukuthi kuzokwenzekani. Kodwa uma ngilithola ithuba ngizolibamba ngazo zombili.”
IChiefs kubhekwe ukuthi imemezele umqeqeshi omusha weqembu elikhulu elenze kabi ngesizini ephelile. Lokhu kuzofanele kunikeze abadlali abasebancane njengoShopane ithemba lokuthi bonke baqala kabusha emehlweni omqeqeshi omusha.
Uma kuyinhloso yeChiefs ukwakha kufanele ukuthi kumkhuthaze ukubona ontanga yakhe uWiseman Meyiwa, Siyabonga Ngezana noSiphosakhe Ntiyantiya beboshelwa eqenjini elikhulu, benze kahle. Ekuqaleni kwesizini uShopane ubolekiswe kwiCape Town All Stars edlala kwiNational First Division (NFD).
Kodwa umqeqeshi weChiefs weMDC, u-Arthur Zwane, umbuyisile ngoJanuwari ethi isitayela esidlalwa kwiStars asihambisani neseChiefs.
Ngaleso sikhathi umdlali ubesegijime imidlalo engu-12 kwiNFD.
“Kungisizile ngoba ngithole ithuba lokudlala. Bekuyinto ehlukile kimina njengomdlali osemncane kodwa bekuyisipiliyoni engisidingayo. Ngibone ukuthi ngiyakwazi ukubhekana nezimo ezehlukile ngoba njengomdlali akumele unethezeke. Ngesikhathi ngibuya umqeqeshi ungitshelile ukuthi kumele ngiqhubeke nokuzimisela ngenze konke ngokungamandla ami,” kusho uShopane.