ISuperSport ihlanganise izitha ezimbili
BAZOSEBENZA ndawonye abayinkukhu nempaka – uPitso “Jingles” Mosimane, ocija iMamelodi Sundowns, nesilomo somsakazi wakwaSuperSport, uRobert Marawa.
Lokhu kuvele ngoLwesine ezindlini zokusakaza zakwaSuperSport eRandburg ngesikhathi kwethulwa izingwazi ezizokwethula iNdebe yoMhlaba kulesi siteshi.
Phakathi kwezingwazi eziboshelwe yiSuperSport ezizokwethula iNdebe yoMhlaba kukhona uYaya Toure, obegijima kwiManchester City, uGianfranco Zola odume kwiChelsea naseqenjini lesizwe lase-Italy, uDwight Yorke owayeyibamba kwiManchester United, uJayJay Okocha waseNigeria noPhil Neville ogqame kwi-Everton nakwiManchester United.
AbakwaSuperSport baveze ukuthi noMosimane uzoba kubahlaziyi abazokube bethula imidlalo yeNdebe yoMhlaba eseRussia.
Kubasakazi abazobe bethula imidlalo kukhona uMarawa, Carol Tshabalala, Neil Andrews no-Andy Townsend. INdebe yoMhlaba izoqala ngoJuni 14.
UMarawa noMosimane ababhekani. Muva nje uMosimane usanda kusola uMarawa nethimba lakhe labahlaziyi ohlelweni lwakhe olungena ngoMsombuluko i-Extra Time okukhona kulona uFarouk Khan ngokukhankasela uFadlu Davids opheka iMaritzburg United ukuthi aqokwe njengomqeqeshi ovelele kwiPremier Soccer League (PSL).
Ngemuva kwalokho uMosimane uphinde wasola uMarawa ngenzondo ngesikhathi ekhuluma ohlelweni lukaThomas Mlambo kwiMetro FM. Ubengayi ukoba nengxoxo kwiMetro kusekhona uMarawa kodwa kuthe angahamba wezwakala noMpho Letsholonyane njengoba ephinde wabuya sekukhona uMlambo.
Exoxa noMlambo wathi ubengamenywa kwiMetro kusekhona uMarawa futhi akanandaba ngokuthi akabizwa ezinhlelweni zakhe azenza kwiSuperSport ngoba vele isikhathi esincane asithola ngemuva kwemidlalo sanele.
Akayi kwi-Extra Time neThursday Night with Marawa okuyizinhlelo ezenziwa yilolu qweqwe lo msakazi.
Lezi zinkunzi ezishaya into ecokeme emikhakheni yazo kuzomele zisebenze ndawonye kwiNdebe yoMhlaba. Impi yazo isuka kudala ngaphambi kokuthi uMosimane athathe umsebenzi wokupheka iBafana Bafana.