Usezogijima kwelaseBelgium umgadli owaduma kwiChiefs
UJOYINE izinkunzi zaseBelgium, i-Anderlecht, umgadli odume kwiKaizer Chiefs uKnowledge Musona.
Lezi zindaba Isolezwe lizizwe ngemenenja yakhe uMike Makaab weProSport International.
“UMusona usejoyine elinye iqembu elikhulu eBelgium. Abemaningi amaqembu abemfuna kodwa wajoyina leli alijoyinile. Usayine inkontileka yeminyaka emine,” kusho uMakaab.
Ngemuva kwemizuzu nje uMakaab eqede ukukhuluma naleli phephandaba, i-Anderlecht ifake isithombe sikaMusona lapho ibiqinisekisa ukuthi isisayinise lo mgadli odabuka eZimbabwe.
UMusona ubelokhu ekhonjwa emaqenjini aseNingizimu Afrika. Ngesonto eledlule uPotshoza weSolezwe uveze ukuthi lo mgadli ugaqelwe yiStandard Liege njengoba esesayiniswe yi-Anderlecht elinye lamaqembu amakhulu eBelgium.
UMusona uzakhele igama kwiChiefs kumasizini edlule ngaphambi kokuthi aye kodlala eGermany. Izinto azizange zimhambele kahle eGermany okuphoqe ukuthi abolekiswe kuMakhosi.
Ngemuva kwalokho ujoyine iKV Oostende abedlala kuyona no-Andile Jali okubhekwe ukuthi ajoyine iChiefs ezinsukwini ezizayo.
UMusona ukhona esikwatini saseZimbabwe esizoyibamba kwiCosafa Cup. Kubhekwe ukuthi abambe elikhulu iqhaza kuleli qembu ekutheni libe ngompetha balo mqhudelwano.
I-Anderlecht eyodlalelwa nguMusona iqede endaweni yesithathu kwi-log okusho ukuthi ngesizini ezayo izobe idlala kwiEuropa League.
Lokhu kuzonika uMusona ithuba lokuzidayisa kwamanye amaqembu amakhulu ase-Europe uma eqhubeka nefomu yakhe enhle.
“UKnowledge usebenzile. Uvuna izithelo zokusebenza ngokuzikhandla. Ikusasa lakhe liqhazakile e-Europe. Ngiyamjabulela ngoba ngiyazi ukuthi usebenza kanzima kangakanani,” kusho uMakaab.
UMusona kubhekwe ukuthi ahambe ezinyathelweni zezingwazi zabagadli baseZimbabwe abagqame emaqenjini amakhulu phesheya kwezilwandle njengoPeter Ndlovu noBenjani Mwaruwari.