Umsindo ngokuqoshwa kwengoma ngeChalaha
kuMantshontsho Kamaskandi Awards, ucule ngokuhlanganyela nenyanga yaseThekwini uDkt Andile ‘Mzimbukhalimali’ Dlamini nonjiniyela womculo uMantongomane eDown Hill Studio.
Yize kukhona abakhalile bethi uNdoni ungusomathuba kodwa abanye bayithakasele kakhulu ingoma. Umholi wabalandeli bakaMjik’jelwa, uSoh Mkhonza, uthe ngeke asho ukuthi kukhona okuhle noma okubi kodwa kukunembeza womuntu ukuthi uqophe le ngoma ngoba ezwelana nomndeni noma neziHonga noma uyenze ngoba efuna udumo. “Abayenze ngoba bezwelana nomndeni sibashayela inhlombe kodwa abeyenze ngoba befuna isasasa siyabagxeka.” UMkhonza uthe kodwa bekungaba kuhle ukube laba baculi balindile kwafihwa kuqala ngoba kukhona asebethi uMjik’jelwa uselele kobandayo ekubeni engakangcwatshwa.
Nembongi eke yasebenza kakhulu nezilomo zikamaskandi, Indidane noKhuzani, uMP Mkhize Da Bee, ayifunanga ukusala ngaphandle ngoba nayo iqophe inkondlo ehambisana nezinsimbi ezipholile esihloko sithi Bengingeke Ngingakhali. UMP Mkhize Da Bee, osanda kukhipha ingoma ethi Ramaphosa, uthe uthintekile ngokushona kukaMjik’jelwa ngenxa yokuthi ubengumculi ozithobile.
“Sake sahlangana naye komunye umcimbi ngambikela ngobunzima engihlangabezana nabo endimeni yomculo, wanginika inombolo yakhe yocingo ngoba wayesematasatasa.
“Nangempela ngakhuluma naye ocingweni waze wanginika nenombolo kaKhulubuse Zuma. Ubengazitsheli futhi ehlonipha wonke umuntu,” kusho uMP Mkhize Da Bee oseke wasebenza namaciko asentshonalanga ye-Afrika.
Nomculi oculisa okweChalaha futhi oke walivuma lisaphila ngokucula amanoni alo engomeni eyodwa, uMjikijeli, naye ukhiphe unqambothi lwengoma okuhlanganiswe kuyo isigqi se-fussion nesikamaskandi.
*Inkonzo yesikhumbuzo sikaMjik’jelwa izoba seThekwini Community Church ku-181 Anton Lembede/Smith Street ngoLwesine phakathi kuka-4 ntambama no-8 ebusuku kanti umngcwabo uzokuba KwaJikijiki KwaMaphumulo ngoMgqibelo ngabo-9 ekuseni.