I-Cwusa izokweseka oweSolezwe

INYUNYANA yamaciko, iCreative Workers Union of South Africa (Cwusa) KwaZulu-Natal, izibophezele ekubambisaneni neSolezwe ekulweni nesihlava sokubulawa nokuhlaselwa kwabantu besifazane.

Ukwanda kwezigameko zokuhlukunyezwa kwabesifazane kwenze Isolezwe lahlela umkhuleko ngaphansi komkhankaso i#Sekwanele. Umkhuleko ngowokushweleza kuNkulunkulu ukuthi lezi zigameko ziphele. Uzoba seThekwini Community Church ngo-10 ekuseni ngoLwesine.

Omunye wabaholi beCwusa, uThokozani “T’zozo” Zulu, uthe bazoba yingxenye yomkhuleko ngoba abahambisani nokuthi abantu besifazane bahlale behamba bejeqeza.

“Aseneme ngokuhlukunyezwa kwabesifazane, babalulekile empilweni ngoba yibo inzalabantu,” kusho uT’zozo.

Uqhube wathi bayabafundisa nabaculi abasafufusa ngokuthi benze umculo onomyalezo ukuze kushintshe izwe.

“Ngihlale ngithi akukwazi ukuthi umculi athi efika bese ecula ngokuthi uyisikhokho kangakanani. Kungcono abhale ingoma enomyalezo. Bheka nje sizenzile izingoma ezikhuluma ngokuphepha emgwaqweni, iVal’ingozi, kukhona enye ye-Operation Hlasela eyayikhuluma ngokuthi abantu babikeubugebengu emaphoyiseni ubugebengu futhi kukhona nenye esayenza noPhuzekhemisi eyayigxeka ukucwasa ngokobuzwe. Zonke izinto ezikhungethe umphakathi siyaye sikhulume ngazo ngoba ubuciko buneqhaza elikhulu. Bheka nje oHugh Masekela noMbongeni Ngema bayibamba ishisa belwa nobandlululo kanjalo noSam Nzima obefihlwa ngempelasonto,” kusho uT’zozo.

Umkhuleko uzoqala ngo-10 ekuseni kanti wonke umuntu uvumelekile.