Isikhalo ngokhetho lokuchibiyela eMtubatuba
LUSENGCUPHENI yokuba luqalwe phansi ukhetho lokuchibiyela lwaseMtubatuba ngemuva kokuthi i-ANC ifake isikhalo sokuthi kuvote abantu okungebona abendawo.
Izolo, iKhomishana ebhekele ukhetho KwaZuluNatal, iveze ukuthi ngokwayo akekho onqobile ngoba kusenziwa uphenyo ngamavoti.
Ukhetho belungoLwesithathu kanti kuthe ngoLwesine i-IFP yabhiyoza ijabulela ukuthi izibalo zivuna yona.
NgoLwesihlanu, i-ANC ijube uNkk uBelinda Scott ohola ikomiti lezomthetho kuleli qembu ukuba aqoqe bonke ubufakazi yabe isifaka isikhalo.
UNobhala we-ANC esiFundeni iFar North, uMnuz Siphile Mdaka, uthe bafake isikhalo ngoba besola ukuthi kuvotiswe abantu abangafanele.
“Sibe nezinsolo zokuthi bavotise abantu ababalelwa ku-211 okungebona abaku-ward 4. Kuthe uma sibikela ikhomishana yokhetho ezimele, nayo yathola ukuthi emabhukwini ayo abantu abangaphezulu kuka-1 000 bekungebona abaku-ward-4 kodwa bavela ohlwini lwango-2016 lwaseNquthu, KwaHlabisa naseJozini. Akugcinanga lapho kodwa kwenziwe uphenyo emzini yabantu noluveze ukuthi kuleyo engu-17 abayihambele, bangu-15 abangaziwa kuyo yize bebebhalise ngemininingwane yayo. Kumanje silinde impendulo ku-IEC ukuze sithole ukuthi bathatha siphi isinyathelo,” kusho uMdaka.
Uqhube wathi empeleni baqale ukukhononda ngoMsombuluko lungakafiki ukhetho, baya enkantolo kodwa yabachitha ngokuthi udaba lwabo aluphuthumi.
UMdaka uthe abanendaba nemiphumela kodwa abakhala ngakho ukuba kwenziwe ubulungiswa.
Uthe uma udaba lwabo lubehlula ku-IEC bazobuyela enkantolo ukuze ukhetho luqalwe phansi.
UMnuz Mawethu Mosery we-IEC eKZN, uthe udaba bayalwazi kodwa basalusebenza.
“Ngokomthetho sinezinsuku ezintathu ukuba sisebenze isikhalo esisuke sikhona. Nakulolu daba siluqale ngoLwesihlanu kanti sizoletha izimpendulo ngoLwesithathu. Okwamanje ukhetho lwaseMtubatuba akekho olunqobile.