Kuvalwe isikole kusuka uthuthuva
BASALE dengwane abafundi besikole saseZingcengeni, eTugela Ferry eMsinga, iThemani Combined, kuvalwa isikole emuva kothuthuva olususwe wukuphakelwa kwezingane.
Omunye wabazali abakhathazekile futhi ocele igama lakhe lingavezwa, uthe sekuyisonto lesibili abafundi bakaGrade 1 kuya kuGrade 12 bebhuquza emakhaya.
“Into eyasusa umsindo wukunikezwa kwabanye abantu besifazane ithenda yokuphekela izingane ukudla. Okususe umsindo wukuthi kwakuvunyelwene ngokuthi bazosebenza iminyaka emibili bese bededela abanye kodwa bona sebeyoqala unyaka wesithathu,” kusho umzali.
Uthe kuningi okungahambi kahle njengokuxhashazwa kwemali yesikole nokuthi uthishanhloko ubuye ashaye othisha ngezimpama.
“NgoJanuwari abafundi babuya isikole sicishelwe ugesi ngemuva kokuba i-Eskom ithole ukuthi ukokotelwe. Kwabe sekuvela ukuthi kusetshenziswe uR36 000 ukuwuvula ngaphandle kwemvumo yabazali, kwacaca ukuthi kukhona abaxephula umkhoma.”
Uthe kukhona uthisha owaqhunyiswa ngempama nguthishanhloko kwaze kwaphoqeleka ukuthi abalekiselwe kwesinye isikole.
Omunye umzali ongathandanga ukudalulwa uthe isikole sivamise ukukhiqiza imiphumela engenelisi kangangoba abanye abazali sebephoqelekile ukuba bayofundisa izingane zabo kwezinye izikole. “Ngikhuluma nje izingane zaseMantungweni, ezakwaMpungose nezakwaMkhungo sezihamba amabanga amade ngoba zayiswa ezikoleni ezibuqamama.”
Usihlalo wesigungu esilawula isikole, uMnuz Zwelombango Mntungwa, uvumile ukuthi sivaliwe isikole ngenxa yokuthi othisha bazizwe bengaphephile ngemuva kokuba kube nomhlangano esikoleni ngoMgqibelo. “Bathe bafuna kulandwe umqondisi azochaza ukuthi wathini kubazali ngesikhathi eze kulesi sikole.” UMabaso unxuse abazali ukuba babayeke othisha bafundise, bangafaki izingane ezintweni ezingahlangene nazo.
Ethintwa uthishanhloko, obizwe ngoMnuz Mvana Ndlela, uvumile ukuthi basivalile isikole. “Sicele umqondisi ukuba asinikeze usuku lokuhlangana naye, washo uLwesihlanu. Sicelile kodwa ukuba alusondeze ngoba lukude kakhulu njengoba sifuna izingane zisheshe zibuye,” kusho uNdlela othe wuhlelo lokuphakelwa kwezingane ukudla olususe uthuthuva. Okhulumela uMnyango wezeMfundo KwaZulu-Natal, uMnuz Sicelo Khuzwayo, esaphenya ngodaba.