Umbango wesidumbu enkantolo
IBHEKENE ngeziqu zamehlo imindeni emibili yaseMondlo, eVryheid, ebanga isidumbu sowesifazane okuthiwa wayesehlukanisile nomyeni wakhe kodwa usenqwahe nesidumbu sakhe.
Sekuphele amasonto amathathu engangcwatshiwe uNksz Mimi Nene (53) owashona ngoMeyi 9 emuva kokugula. Umbango wesidumbu usufakwe eNkantolo eNkulu eMgungundlovu.
Ngokuthola kweSolezwe umndeni wakwaNene ubufuna ukuzingcwabela umufi kodwa isidumbu sithathwe ngobengumyeni wakhe uMnuz Nkosinathi Hlengwa.
UMnuz Bhekumuzi Nene, umshana kamufi, uthe ubabekazi wakhe wahlukanisa eminyakeni eyishumi edlule futhi bebengasabhekani noHlengwa.
“UHlengwa ubesefuna ukubuya baxolelane kodwa ubabekazi ubengezwa lutho ngalokhu. Ugulile wahanjiswa esibhedlela yibona abakwaHlengwa, babuye sebesitshela ukuthi ushonile. Okusixakayo wukuthi washona ebusuku kodwa bona bafika ekuseni sebenaso nesitiketi sokushona esingazi ukuthi basenza nini. Ngalo usuku ashona ngalo uHlengwa ungene emzini kamufi wasebenzisa nemoto yakhe,” kusho uMnuz Nene. Uthe benze incwadi yokubakhipha endlini ngesonto eledlule.
Umndeni wakwaNene uphinde wenza incwadi yesivimbelo sokuthi abakwaHlwengwa bangasondeli emzini kamufi emuva kwengxabano kodwa abakwaHlengwa banqabile ukuyisayina.
Kumanje akwaziwa ukuthi kuzongcwatshwa nini ngoba kulindwe kuzwakale ukuthi inkantolo izovuna muphi umndeni.
UHlengwa uthe ngeke aphawule ngoba selusenkantolo. Ucele ukuthi kuthintwe ummeli wakhe, uMnuz Melokuhle Shabangu weMM Shabangu Attorneys.
UShabangu ukuqinisekisile ukuthi udaba lusenkantolo kodwa abakanikwa usuku lokukhishwa kwesinqumo. Uvumile ukuthi kunombango wesidumbu. Uphikile ukuthi umufi wahlukanisa eminyakeni eyishumi edlule wathi wahlukanisa ngo-2012. Uthe kufakwe isinqumo esisheshayo sokuthi kungenelele inkantolo.
“Umufi wadivosa ngo-2012 futhi kunencwadi yefa kulolu daba yingakho udaba lusenkantolo. Ngeke ngikwazi ukuveza eminye imininingwane ngencwadi yefa ngoba akukayiwa enkantolo. Silinde ukuthi lingakapheli isonto sinikezwe usuku lokuya enkantolo,” kusho uShabangu.
Ikhansela lendawo, uMnuz Khonza Thwala, uthe ubikelwe ngalokhu kodwa watshela umndeni wakwaNene ukuthi kungaphezu kwamandla.
Umufi ubesehlala nowesilisa obemgadile emzini wakhe ngoba ubengenangane. Umndeni wakwaNene usola ukuthi izimbangi zawo zifuna ifa likamufi nemishwalensi yakhe. AbakwaNene bathe umufi walala esibhedlela izinsuku ezintathu. Bathe uHlengwa ubenomunye wesifazane okusolwa ukuthi ngumkakhe, okuthiwa uyathinteka embangweni.