Izolungiswa emva kokhetho eyeKhabhinethi
UMENGAMELI uCyril Ramaphosa uthe indaba yokuncishiswa kweKhabhinethi izokwenzeka ngemuva kokhetho lukazwelonke ngonyaka ozayo.
URamaphosa uthe le ndaba iqalwe nguye ngesikhathi ethula inkulumo ebibhekiswe esizweni ngasekuqaleni konyaka.
Uthe iKhabhinethi inkulu uma uyiqhathanisa namanye amazwe.
“Ngeke siyenze manje ngoba senza ucwaningo ukuze sibone ukuthi yimiphi iminyango okumele ihlukaniswe naleyo okumele ihlanganiswe. Kunekomiti elibheka lokhu ukuze sazi ukuthi siyihlele kanjani iminyango. Akuyona into okumele siyijahe uma siqeda ukhetho ngonyaka ozayo sizoyibheka ukuze siyinciphise,” kusho uRamaphosa.
Usho lokhu ephendula imibuzo yabalaleli beziteshi zomsakazo zesiNguni zakwa-SABC abekhuluma kuzo okubalwa noKhozi FM ngeSonto ebusuku.
I-DA izwakalise ukukhathazeka ngesibalo esikhulu seKhabhinethi ithi uma uRamaphosa esebenzisa iKhabhinethi eyayisetshenziswa ngowayengumengameli uMnuz Thabo Mbeki angonga u-R52.2 million.
URamaphosa uthe indaba yokususwa kwePhalamende liyiswe ePitoli yinto eyaqala ukukhulunywa kusekhona uMandela.
“Nathi sizoyibheka indaba yokususwa kwePhalamende ngoba kudingeka senze ucwaningo. Kumele sibheke ukuthi indaba yezimoto nezindlu zongqongqoshe. Yinto ezothatha isikhathi.”
Mayelana nendaba yokubuyiswa komhlaba ngaphandle kwesinxephezelo uthe uhlelo oluqhubekayo abajiki ngalo.
“Umhlaba wathathwa kubantu abamnyama ngaphandle kwesinxephezelo, wathathwa ngendlela engafanele. Kubalulekile ukuthi siyisebenze ngendlela eyiyo eyomhlaba ngoba kusuka ngo-1994 izinto sizenza ngendlela nakuba sibuye sithathe isikhathi eside. Akusijabulisi ukuthi abantu bethu basahlala emkhukhwini, umhlaba kumele ubuye,” kusho uRamaphosa.
Uthe sebakhe izindlu ezingu-4 million, uhulumeni we-ANC uyazi baningi abantu abasafuna izindlu.
“Yinto engakaze yenzeke e-Afrika ukuthi abantu bakhelwe izindlu ezingaka. Abantu bafuna ukunikwa nezindawo zokwakha sifake amanzi nogesi ukuze bazakhele izindlu. Sifuna umhlaba osemadolobheni ukuze zilungiswe izindawo banikwe zona bakhe. Sizoqhubeka nokwakha izindlu eziningi njengoba sihlose ukuthi sakhe ezibalelwa ku-1.2 million,” kuqhuba uRamaphosa.
Ubuye wakhuluma nangomyalezo awufaka ku-Twitter entela owawuthi kuyasatshenzwa ehhovisi likamengameli wathi ukuba uZuma wayemtshelile ngabe wacabangisisa.
“Sengilapha manje umsebenzi uyaqhubeka, awupheli umsebenzi kamengameli,” kusho uRamaphosa.