Yinkulu inzuzo kowesilisa osokile
KUBE yintokozo enkulu kimina ukusoka komuntu obe ngowesigidi KwaZulu-Natal selokhu Isilo SamaBandla sahlaba ikhwelo lokuba kusokwe amadoda esifundazweni sakithi ukuze kunqandwe ukubhebhetheka kwezifo ezithelelana ngokocansi, okubalwa kuzo i-HIV.
Kufanele futhi sikusho ukuthi selokhu sawuqala lo mkhankaso ngo-2010, akukaze kubikwe sigameko sokushona kwabantu ngenxa yakho.
Sifisa ukudlulisa ukubonga okukhulu kuBhejane Ephuma Esiqiwini ngokusinika umhlahlandlela nomfutho wokuvuselela lo mkhankaso. Ngeke sibashiye ngaphandle bonke abantu ababambe iqhaza empumelelweni yalo mkhankaso, kusukela kubasebenzi bezempilo kuye ezinhlanganweni esibambisene nazo ezizimele, namadoda asesokile, kuze kufike kubazali abasabelile kuleli khwelo baletha abantu babo ukuze sibasoke nalabo abasazosabela.
Impumelelo engaka yokusokwa kwabesilisa isiqinisa idolo, isinike nethemba lokuthi iyogcina ifezekile injongo kahulumeni wakuleli yokuthi kube nezizukulwane ezingayazi nhlobo i-HIV.
Ukusoka kumqoka njengoba kuvimbela ukubhebhetheka kwegciwane lengculazi. Kwehlisa amathuba okusuleleka ngeHIV kowesilisa kusuka kowesifazane ngo-60%; kuphinde kugweme ukuphathwa wumdlavuza wesibeletho kowesifazane.
Ukusoka kunenzuzo enkulu kowesilisa njengoba kwenza isitho sakhe sangasese sihlale siphile kahle futhi sihlanzekile, kwehlise namathuba okuba owesilisa aphathwe wumdlavuza wesitho sakhe sangasese.
Ngeke kusisize nokho ukuthi sigiye kuze kweqe ngempumelelo yalo mkhankaso ngoba umsebenzi awukapheli. Empeleni, sinenselelo yokuba siphinde sisoke abanye futhi abesilisa abayisigidi ngokushesha ukuze umthelela walo mkhankaso uzwakale kakhulu kunakuqala ukwehlisa isibalo sabantu abangenwa yi-HIV kanye nezinye izifo ezithelelana ngokocansi.
Njengenhlalayenza, njengoba kuzoqala amaholidi ezikole kaJuni, uMnyango wezeMpilo uzophinde ube nezinkambi lapho sifundisa abesilisa ngempilo, siphinde sibahlole, bathole nokululekwa ngokwengqondo, maqede basokwe.
Kubalulekile ukuhlumelelisa isimilo kubantu besilisa kusukela besebancane ukuze bakhule babe ngamadoda aqotho angomuso, azozihlonipha, aphinde ahloniphe abantu besifazane nezingane. Yingakho abantu abasokwa kulezi zinkambi sibuye sibafundise ngokubaluleka kokuziphatha kahle nangendlela eqotho.
Ngale ndlela, siyethemba nokuthi siyogcina sishabalele isihlava esibhekene naso sokuhlukunyezwa kwabantu besimame nabantwana.
Sithanda ukunxusa abesilisa asebekhulile abangakasokwa nabazali noma labo ababheke abantwana babafana abangakasokwa ukuba bayibhekisise basisize beze bezosokwa.
Ukusoka kwenziwa mahhala futhi kwenziwa ngabantu abanolwazi olunzulu ekusokeni, nokwenza kungabi buhlungu obungako.
Umuntu osokile usheshe elapheke futhi uhlala ephephile, aphile isikhathi eside.
Uma ufuna ukusoka , nakhu okumele ukwenze:
• Yiya emtholampilo oseduze nawe, lapho bazofike bakweluleke baphinde bakweseke;
• Kulungele ukuthi ungafike uhlolele ushukela, umfutho wegazi, isifo sofuba negciwane lengculazi;
Siyafisa ukukugcizelela ukuthi ukusoka akumniki umuntu igunya lokuthi usengavele alale nje noma kanjani ngaphandle kokusebenzisa ikhondomu uma eya ocansini, ngoba kuwanciphisa ngo-60% kuphela amathuba okuthola ingculazi.
UDkt Sibongiseni Dhlomo uwuNgqongqoshe wezeMpilo KwaZulu-Natal.