Ifuna ukubuyela osikweni lwayo lwakudala iSuperSport United
ISIKHATHELE wukushintsha abaqeqeshi iSuperSport United efuna ukubuyela entweni yayo yakudala yokugcina abaqeqeshi isikhathi eside.
Leli qembu lithungatha umqeqeshi. Phakathi nesizini lishiywe ngu-Eric Tinkler obephikwa yimiphumela.
UKaitano Tembo ubambe izintambo kwaze kwaphela isizini. Amatsatsantsa a Pitori abalwa namaqembu agaqele uLuc Eymael weFree State Stars.
UStanley Matthews oyisikhulu esiphezulu kwiSuperSport utshele Isolezwe ukuthi bafuna umqeqeshi ozozinza eqenjini.
Eminyakeni eyedlule iSuperSport United izakhele igama ngokugcina abaqeqeshi isikhathi eside. Selokhu kwahamba uGavin Hunt ngo2013 izinto azikaze ziphinde zilunge kuleli qembu. Phakathi kwabaqeqeshi abafike bangahlala isikhathi eside singabala uGordon Igesund, Cavin Johnson, Eric Tinkler noStuart Baxter.
Eminyakeni emihlanu leli qembu seliphekwe ngabaqeqeshi abane abahlukene.
“Nginenqwaba yezicelo zabaqeqeshi abafuna ukucija iqembu. Kusamele ngihlale phansi noKaitano (oyiphini labaqeqeshi) ngizwe ukuthi uwugaqele yini lo msebenzi. Ngeke size sixhamazele. Sesishintshe inqwaba yabaqeqeshi kula masizini edlule. Njengamanje sesibheke umqeqeshi ozozinza eqenjini. Asikwazi ukushintsha abaqeqeshi isizini nesizini,” kusho uMatthews.
UHunt uhlale amasizini ayisithupha kuleli qembu alijoyine ngo-2007. Lo mqeqeshi osecija iBidvest Wits wafika kwiSuperSport ezovala isikhala sikaPitso” Jingles “Mosimane.
UMosimane wayehlale kwiSuperSport kusukela ngo-2001 waze wahamba ngo-2006.
“Sizoba nohlu lwabaqeqeshi esizohlunga kulona ozothola umsebenzi. Sijwayele ukusebenzisa le ndlela uma siqasha umqeqeshi. Umqeqeshi esingazange silenze uhlu ngesikhathi simqasha nguGordon Igesund. Kuningi okufanele sikubheke ngaphambi kokuthatha isinqumo. Okwamanje angikwazi ukudalula amagama abaqeqeshi abafake izicelo zomsebenzi. Abanye abaqeqeshi banezinkontileka namaqembu abo ngakho kumele sikuhloniphe lokho,” kusho uMatthews.
ISuperSport ibidonsa kanzima. Kudingeke ukuthi inqobe umdlalo wokugcina ukuze igweme ukuyodlala emidlalweni yokuhlunga.
“Sifunde okuningi kule sizini esanda kusongwa. Okuhle wukuthi ngesizini ezayo sizobe sigxile emidlalweni yasekhaya ngoba asikho emaqenjini ayodlala emiqhudelwaneni yeCAF. Iqembu lizokwazi ukuvuka lizithathe. Selokhu ngaqala ukusebenza asikaze sizithole sikulesi simo ebesikusona ngesizini edlule. Asikaze singaqedi kwi-Top 8,” kusho uMatthews.
ISuperSport ibingangenile kwiTop 8 kodwa yangena ngemuva kokuthi i-Ajax Cape Town iphucwe amaphuzu ngokudlalisa uTendai Ndoro.